زرعی قانون: پرینکا گاندھی نے بی جے پی حکومت پر کسانوں کا درد نہ سننے کا لگایا الزام

کانگریس جنرل سکریٹری پرینکا گاندھی نے زرعی قوانین کو لے کر بی جے پی حکومت کو تنقید کا نشانہ بنایا ہے اور اس پر کسانوں کا درد نہ سننے کا الزام عائد کیا ہے۔ پرینکا گاندھی نے بدھ کے روز ٹوئٹر کے ذریعہ ایک کسان کا ویڈیو جاری کیا اور کہا کہ بی جے پی حکومت کسانوں کا حق مارنے والے بلوں پر سرکاری کھاٹ سمیلن تو کر رہی ہے لیکن کسانوں کا درد نہیں سن رہی۔

پرینکا گاندھی نے کہا کہ اتر پردیش میں تقریباً سبھی جگہوں پر کسان اپنا دھان 1868 روپے فی کوئنٹل ایم ایس پی سے 800 روپے سے کم پر یعنی 1000-1100 روپے فی کوئنٹل فروخت کرنے پر مجبور ہیں۔ ایسا تب ہے جب ایم ایس پی کی گارنٹی ہے۔ انھوں نے کہا کہ سوچیے، جب ایم ایس پی کی گارنٹی ختم ہو جائے گی تب کیا ہوگا۔

غور طلب ہے کہ مودی حکومت کے ذریعہ حال میں پیش کردہ تین نئے زرعی قوانین کے خلاف ملک بھر کے کسانوں میں ناراضگی ہے۔ کانگریس لگاتار ان قوانین کی مخالفت کر رہی ہے۔ کسانوں اور کانگریس کا الزام ہے کہ ان نئے قوانین سے کسانوں کو کارپوریٹ کے ہاتھوں کی کٹھ پتلی بننے پر مجبور ہونا پڑے گا۔ ساتھ ہی ان قوانین کے بعد ایم ایس پی کی گارنٹی بھی ختم ہو جائے گی۔

ان قوانین کی مخالفت میں پنجاب کی کانگریس حکومت نے اسمبلی کا خصوصی اجلاس بلا کر تین بل پیش کیے، جسے اسمبلی نے اتفاق رائے سے پاس کر دیا۔ پنجاب کے وزیر اعلیٰ امریندر سنگھ نے مطالبہ کیا ہے کہ مرکزی حکومت ان زرعی قوانین کو واپس لے۔ وہ اس سلسلے میں مرکزی حکومت کو اب تک تین خط بھی لکھ چکے ہیں۔