شمالی کشمیر میں ملی ٹنسی کا خاتمہ عنقریب: پولیس سربراہ

بارہمولہ: جموں و کشمیر پولیس کے سربراہ دلباغ سنگھ نے کہا کہ شمالی کشمیر میں ملی ٹنسی کا خاتمہ قریب ہے۔ انہوں نے کہا کہ وادی بھر میں ملی ٹنٹ مخالف آپریشنز سردی کے موسم میں بھی جاری رکھے جائیں گے۔ پولیس سربراہ نے یہ باتیں اتوار کو یہاں ایک تقریب کے حاشیے پر نامہ نگاروں کے سوالات کا جواب دیتے ہوئے کہیں۔

انہوں نے کہا کہ 'یہاں پر ملی ٹنسی قابو میں ہے اور خاتمے پر پہنچ چکی ہے۔ مجھے امید ہے کہ لوگوں کے تعاون سے ملی ٹنسی کا بہت جلد خاتمہ ہو جائے گا'۔ دلباغ سنگھ نے کہا کہ وادی کشمیر میں ملی ٹنٹ مخالف آپریشز پچھلے سال کی طرح اس سال بھی سردی کے موسم میں جاری رکھے جائیں گے۔

دلباغ سنگھ کا مزید کہنا تھا کہ 'ملی ٹنٹوں نے پاکستان کے اشارے پر بے گناہ عام شہریوں کو نشانہ بنانا شروع کر دیا ہے۔ یہ پاکستان اور ملی ٹنٹوں کے لئے شرمناک بات ہے۔ ملی ٹنٹوں کی ان کارروائیوں کو کامیاب نہیں ہونے دیا جائے گا۔ ان کو منہ توڑ جواب دیا جائے گا۔ حالیہ شہری ہلاکتوں میں ملوث ملی ٹنٹوں کی شناخت ہو چکی ہے اور ان کو ٹریک کرنے کی کوششیں کی جا رہی ہیں'۔

پولیس سربراہ نے کہا کہ پاکستان نے لائن آف کنٹرول پر لانچنگ پیڈس کو گزشتہ برس سردیوں میں بھی ایکٹو رکھا تھا۔ ان کا مزید کہنا تھا کہ 'سردیاں ختم ہونے سے پہلے ہی ملی ٹنٹوں کی ایک قسط بھیجی گئی تھی۔ کیرن سیکٹر کے راستے سے 31 مارچ کو پہلی قسط بھیجی گئی تھی لیکن سیکورٹی فورسز نے انہیں روکتے ہوئے پانچ اپریل کو پانچ ملی ٹنٹوں کو ہلاک کیا تھا'۔

پولیس سربراہ نے کہا کہ اس وقت بڑے پیمانے پر جنگ بندی معاہدے کی خلاف ورزیاں ہو رہی ہیں اور ان کے بقول اس کا مقصد زیادہ سے زیادہ ملی ٹنٹوں کو سرحد کے اس پار دھکیلنا ہوتا ہے۔ تاہم ان کا کہنا تھا کہ 'سرحد پر سیکورٹی پوری طرح سے مضبوط ہے اور دراندازی کی کوششوں کو ناکام بنایا جا رہا ہے'۔