گروگرام-جئے پور ایکسپریس وے پر دراڑ، فلائی اوور کا 3 فیٹ لمبا حصہ نیچے گرا

گروگرام-جئے پور ایکسپریس پر فلائی اوور کے ایک حصے میں دراڑ آنے کے بعد یہ اتوار کے روز نیچے سڑک پر گر گیا۔ افسران نے یہ جانکاری دیتے ہوئے بتایا کہ اتوار کی صبح تقریباً 9.30 بجے شکوہ پور کراسنگ پر فلائی اوور کا تین فیٹ لمبا حصہ سڑک پر گر گیا۔ اچھی بات یہ رہی کہ اتوار کو بیشتر دفاتر میں تعطیل رہتی ہے اس لیے کوئی بڑا حادثہ سرزد نہیں ہوا۔ جس وقت فلائی اوور کا ایک حصہ گرنے کا واقعہ پیش آیا، اس وقت وہاں سے کوئی گاڑی نہیں گزر رہی تھی۔

میڈیا رپورٹ کے مطابق این ایچ اے آئی نے فلائی اوور کے ٹوٹے ہوئے حصے کو بند کر مرمت کا کام شروع کر دیا ہے۔ این ایچ اے آئی نے واقعہ کی جانچ کا حکم بھی صادر کر دیا ہے۔ این ایچ اے آئی ڈائریکٹر اجئے آریہ کا کہنا ہے کہ ’’جانچ جاری ہے اور رپورٹ کے مطابق کارروائی کی جائے گی۔‘‘ قابل ذکر ہے کہ اس سے قبل رامپور فلائی اوور دو مرتبہ ٹوٹ پھوٹ کا شکار ہوا تھا۔

دوسری طرف گروگرام ٹریفک پولیس نے ٹوئٹ کر کے مسافروں کو قومی شاہراہ 48 پر ایک حادثہ کی وجہ سے ٹریفک جام کی جانکاری دی تھی۔ دو دنوں میں یہ دوسرا موقع تھا جب علاقے میں ٹریفک کا مسئلہ پیدا ہوا اور ٹریفک پولیس کو یہ جانکاری عوام کو دینی پڑی۔ اس سے قبل زوردار بارش کے بعد آبی جماؤ کے سبب جئے پور کی طرف مانیسر چوک کے پاس 30 جولائی کو ٹریفک رخنہ انداز ہونے کی اطلاع جاری کی گئی تھی۔