عدالتی فیصلے حکومتیں برسوں نافذ نہیں کرتیں، یہ غیر فعالیت ملک کے لیے اچھی نہیں: چیف جسٹس آف انڈیا

دہلی کے وگیان بھون میں وزرائے اعلیٰ اور ہائی کورٹس کے چیف جسٹس کی مشترکہ تقریب میں سپریم کورٹ کے چیف جسٹس این وی رمنا نے کئی اہم باتیں رکھیں۔ انھوں نے کہا کہ ’’عدالت کے فیصلے حکومتوں کے ذریعہ برسوں نافذ نہیں کیے جاتے ہیں۔ عدالتی اعلانات کے باوجود قصداً غیر فعالیت ہے، جو ملک کے لیے اچھا نہیں ہے۔ حالانکہ پالیسی بنانا ہمارے دائرۂ اختیار میں نہیں ہے، اگر کوئی شہری اپنی شکایت لے کر ہمارے پاس آتا ہے تو عدالت منع نہیں کر سکتی۔‘‘

چیف جسٹس آف انڈیا نے کہا کہ ’’ہمیں لکشمن ریکھا کا دھیان رکھنا چاہیے۔ اگر یہ قانون کے مطابق ہو تو عدلیہ کبھی بھی حکومت کے راستے میں نہیں آئے گی۔ اگر میونسپلٹیز، گرام پنچایتیں ذمہ داریوں کو نبھاتی ہیں، اگر پولیس ٹھیک سے جانچ کرتی ہے اور ناجائز حراست میں مظالم ختم ہوتے ہیں، تو لوگوں کو عدالتوں کی طرف دیکھنے کی ضرورت نہیں ہے۔‘‘ انھوں نے مزید کہا کہ ’’متعلقہ لوگوں کی ضرورتوں اور امیدوں کو شامل کرتے ہوئے گہرائی کے ساتھ بحث اور مذاکرہ کے بعد قانون بنایا جانا چاہیے۔ اکثر ایگزیکٹیوز کی غیر کارکردگی اور مقننہ کے غیر فعالیت کی وجہ سے مقدمے بازی ہوتی ہے جو قابل گریز ہے۔‘‘

این وی رمنا کا کہنا ہے کہ ’’مفاد عامہ عرضی (پی آئی ایل) کے پیچھے اچھے ارادوں کا غلط استعمال کیا جاتا ہے، کیونکہ اسے منصوبوں کو روکنے اور عوامی اتھارٹی کو دہشت زدہ کرنے کے لیے ’نجی مفاد عرضی‘ میں بدل دیا گیا ہے۔ یہ سیاسی اور کارپوریٹ حریفوں کے ساتھ اسکور طے کرنے کا ایک ذریعہ بن گیا ہے۔‘‘