سونالی پھوگاٹ موت معاملے میں سی بی آئی نے 25 دن بعد رجسٹر کیا کیس

ہریانہ بی جے پی کی لیڈر سونالی پھوگاٹ کی موت معاملے میں سی بی آئی نے کیس رجسٹر کر لیا ہے۔ اس کیس کو سلجھانے کے مقصد سے سی بی آئی کی ٹیم 16 ستمبر کو گوا جائے گی۔ سی بی آئی میں یہ کیس سونالی پھوگاٹ کی موت کے 25 دن بعد رجسٹر ہوا ہے۔ قابل ذکر ہے کہ سونالی پھوگاٹ کے رشتہ داروں نے اس موت کے پیچھے سازش کا الزام عائد کیا ہے۔ سونالی کے اہل خانہ لگاتار سی بی آئی جانچ کا مطالبہ کر رہے تھے۔ گزشتہ دنوں گوا حکومت نے سونالی پھوگاٹ قتل کیس سی بی آئی کو دینے کی سفارش کی تھی جس کے بعد پیر کے روز وزارت داخلہ نے ڈی او پی ٹی وزارت کو اس معاملے کی سی بی آئی جانچ کرائے جانے کے لیے خط لکھا تھا۔

دو دن قبل ہی سونالی پھوگاٹ کی بہن روکیش نے سی بی آئی جانچ کا مطالبہ دہراتے ہوئے اپنی بہن کی مشتبہ موت میں سیاسی اینگل ہونے کا بھی اندیشہ ظاہر کیا تھا۔ روکیش نے کہا تھا کہ ’’سچائی سی بی آئی کی جانچ کے بعد ہی سامنے آئے گی۔ ہم گوا پولیس کی جانچ سے مطمئن نہیں ہیں۔ گوا پولیس ملکیت کے اینگل سے معاملے کی جانچ کر رہی ہے۔ وہاں قتل کے پیچھے کچھ بڑے لوگ ہو سکتے ہیں۔ سیاسی بنیاد پر سونالی کا قتل ہو سکتا ہے، اس لیے جانچ ہونی چاہیے۔‘‘

سی بی آئی جانچ کی سفارش اور مرکزی وزارت داخلہ سے اس کی منظوری ملنے کے بعد روکیش نے حکومت پر دباؤ بنانے کے لیے کھاپ پنچایتوں کا شکریہ ادا کیا تھا۔ روکیش نے کہا تھا کہ ’’کھاپ پنچایتوں نے اپنا پورا تعاون دیا ہے۔ کھاپ پنچایتوں کی وجہ سے ہریانہ اور گوا کی حکومتوں پر دباؤ بنا ہے۔‘‘ دراصل سونالی پھوگاٹ کی موت کی سی بی آئی جانچ کا مطالبہ کرتے ہوئے گزشتہ اتوار کو ہسار میں کھاپ مہاپنچایت کا انعقاد ہوا تھا۔