وزیر اعلیٰ یوگی نے کروڑوں روپے خرچ کر بنے سگنیچر سٹی بس اڈہ کا بہت دھوم دھام سے کیا تھا افتتاح، بن گیا کتوں کا بسیرا

اتر پردیش واقع کانپور کے وکاس نگر میں سگنیچر سٹی بس اڈہ کا افتتاح ہوئے ایک مہینہ سے زیادہ وقت گزر چکا ہے، لیکن اب تک یہاں سے بس کی روانگی نہیں ہوئی ہے۔ یہ حال تب ہے جب کروڑوں روپے کے خرچ سے تعمیر اس بس اڈے کا افتتاح خود وزیر اعلیٰ یوگی آدتیہ ناتھ نے 10 اگست کو دھوم دھام سے کیا تھا۔ افسران نے دعویٰ کیا تھا کہ ستمبر کے پہلے ہفتے سے اس بس اڈے کا استعمال شروع ہو جائے گا۔ لیکن اب تک بسوں کا یہاں سے چلنا جاری نہیں ہوا ہے۔ نتیجہ یہ ہے کہ نو تعمیر اور جدید بس اڈے پر کتوں نے اپنا بسیرا بنا لیا ہے۔

واضح رہے کہ سگنیچر سٹی بس اڈہ شہر کا تیسرا سب سے بڑا بس اڈہ ہے۔ یہاں سے دہلی اور لکھنؤ کے لیے بسوں کو چلایا جانا تھا۔ یہ معاملہ ڈویژنل کمشنر سیکر روڈویز کی جانکاری میں ہونے کے باوجود بسوں کی یہاں سے روانگی شروع نہیں ہو پائی ہے۔ افسران نے وزیر اعلیٰ یوگی سے اس کا افتتاح تو کروا دیا، لیکن اس کے بعد اس کی خبر لینے والا کوئی نہیں۔ یہاں سے نہ بسیں چلتی ہیں، اور نہ ہی سواریاں یہاں پہنچتی ہیں۔

ٹرانسپورٹ کارپوریشن ہیڈکوارٹر میں کنسٹرکشن یونٹ کے انجینئر نے دعویٰ کیا تھا کہ اگست کے آخر تک مسافروں کے بیٹھنے کا انتظام ہو جائے گا اور فرنیچر وغیرہ بھیجے جائیں گے، لیکن یہ دعوے بھی پورے نہیں ہو سکے۔ خالی جگہ کو دیکھتے ہوئے جگہ جگہ آوارہ جانوروں نے اپنا ٹھکانہ بنا لیا ہے۔

میڈیا رپورٹس کے مطابق سگنیچر سٹی بس اڈے کو شروع کرانے کے لیے کانپور کے ڈویژنل کمشنر ڈاکٹر راج شیکھر نے روڈویز ایم ڈی کو خط بھی لکھا ہے، لیکن کوئی اثر دکھائی نہیں دے رہا۔ اس بس اڈے میں بسوں کو کھڑا کرنے کے لیے پلیٹ فارم بنائے گئے ہیں، اور بسوں کی آمد و رفت سے متعلق جانکاری فراہم کرنے کے لیے کمپیوٹرائزڈ انفارمیشن سسٹم بھی لگایا گیا ہے۔ بس اڈے پر مسافروں کے بیٹھنے کے لیے جنرل اور اے سی ویٹنگ روم کا انتظام بھی کیا گیا ہے۔ اتنا ہی نہیں، صاف آر او کا پانی مہیا کرانے کا انتظام اور کھانے پینے کے لیے معیاری فوڈ اسٹال کا انتظام بھی کیا گیا ہے۔