راجستھان میں بی جے پی کو ’ہندوتوا ایجنڈا‘ نہیں چلانے دیں گے، سبھی مذاہب کو ساتھ لے کر چلیں گے: اشوک گہلوت

راجستھان کے وزیر اعلیٰ اشوک گہلوت نے دعویٰ کیا ہے کہ کانگریس کو بی جے پی کے مقابلے میں ہندو مذاہب میں زیادہ عقیدہ ہے۔ انھوں نے کہا کہ ہم بی جے پی کو راجستھان میں ہندوتوا کو اپنا ایجنڈا نہیں بنانے دیں گے۔ ریاست میں سبھی مذاہب، ذات اور طبقات مل کر سیاست کریں گے۔

وزیر اعلیٰ گہلوت نے گردابی طوفان سے بری طرح متاثر ہوئے پالی-جالور ضلعوں کا دورہ کرنے کے دوران یہ بیان دیا۔ انھوں نے کہا کہ بی جے پی کے مقابلے میں کانگریس ہندو مذہب میں زیادہ یقین کرتی ہے۔ بھگوا پارٹی میں کئی ایسے لوگ ہیں جن کا ہندو مذہب سے کوئی لینا دینا نہیں ہے۔ وہ صرف رام مندر تعمیر پر سیاست کرنے کے لیے ہندو بنے ہیں۔ دھیرے دھیرے اب ان کے راز کھل رہے ہیں۔

میڈیا سے بات چیت کرتے ہوئے گہلوت نے کہا کہ ان کی پارٹی گایوں کی خدمت کے لیے آگے بڑھی ہے۔ انھوں نے بتایا کہ ہم نے سب سے پہلے گایوں کی خدمت کا کام کرتے ہوئے گرانٹ بھی دیا، لیکن اس کے نام پر کبھی ووٹ نہیں مانگا۔ گایوں کے لیے بہت کم کام کرنے کے باوجود بی جے پی کھلے عام ’گئو ماتا‘ کے نام پر ووٹ مانگتی ہے۔