حقوق اور اختیارات کی لڑائی لڑتا رہوں گا: مکیش سہنی

بہار حکومت میں وزیر اور وکاس شیل انسان پارٹی (وی آئی پی) کے بانی مکیش سہنی نے جمعرات کو ایک سوال کے جواب میں واضح لفظوں میں کہہ دیا کہ وہ عہدۂ وزارت سے استعفیٰ نہیں دیں گے۔ انھوں نے کہا کہ وزیر بنانا وزیر اعلیٰ کا خصوصی اختیار ہے، وزیر اعلیٰ جیسا کہیں گے وہ کریں گے۔ سہنی نے کہا کہ وہ پسماندہ اور ملاحوں کی لڑائی لڑتے رہیں گے۔

واضح رہے کہ وی آئی پی چیف مکیش سہنی کی پارٹی کے سبھی تین اراکین اسمبلی بی جے پی میں چلے گئے ہیں۔ اس کے بعد پٹنہ میں ایک پریس کانفرنس میں بی جے پی کو تنقید کا نشانہ بناتے ہوئے کہا کہ ہمیں کمزور کرنے کی سازش شروع سے ہی کی جا رہی تھی۔ انھوں نے کہا کہ میں بچپن سے ہی جدوجہد کرتا آ رہا ہوں، اس لیے جدوجہد کرنے سے نہیں ڈرتا۔ آج پارٹی تیزی سے آگے بڑھ رہی ہے تو کئی لوگ پیچھے کرنے کا ہتھکنڈا اپنا رہے ہیں۔

یوپی میں انتخاب لڑنے سے متعلق گفتگو کرتے ہوئے انھوں نے کہا کہ وہاں انتخاب لڑ کر کوئی غلطی نہیں کی ہے۔ میں آخری سانس تک انتہائی پسماندہ، اپنے سماج کے لوگوں کے حقوق اور اختیارات کی لڑائی لڑتا رہوں گا۔ میں جانتا ہوں کہ میں نے جدوجہد کا راستہ اختیار کیا ہے جس میں پریشانیاں آئیں گی۔ سہنی نے بی جے پی ریاستی صدر سنجے جیسوال پر جھوٹ بولنے کا الزام عائد کرتے ہوئے کہا کہ بی جے پی سے جو بات انتخاب کے دوران ہوئی تھی، اس میں وہ شامل نہیں تھے۔