بہار انتخاب: راہل گاندھی نے شرد یادو کی بیٹی کے لیے مانگا ووٹ، مودی-نتیش پر کیا حملہ

کانگریس کے سابق صدر راہل گاندھی نے بدھ کو مدھے پورہ میں ایک انتخابی جلسہ کو خطاب کرتے ہوئے پی ایم نریندر مودی اور سی ایم نتیش کمار پر امیروں کے لیے حکومت چلانے کا الزام عائد کرتے ہوئے کہا کہ ان دونوں نے ارب پتیوں کو آزادی دے دی اور کسانوں و غریبوں کو غلام بنایا۔ انھوں نے سماجوادی لیڈر شرد یادو کو اپنا سیاسی استاد بتاتے ہوئے ان کی بیٹی سبھاسنی یادو کو بہاری گنج سے فتحیاب کرنے کی اپیل کی۔

مدھے پورہ کے بہاری گنج میں ایک عظیم الشان انتخابی جلسہ کو خطاب کرتے ہوئے راہل گاندھی نے کہا کہ نتیش کمار نے بہار کو بدلنے کا وعدہ کیا تھا اور پی ایم نریندر مودی نے انتخابی تشہیر کے دوران دو کروڑ لوگوں کو ملازمت دینے کا وعدہ کیا تھا، لیکن آج تک کوئی بھی وعدہ نہیں نبھایا۔

کانگریس کے سابق صدر نے پی ایم مودی کی نوٹ بندی کا تذکرہ کرتے ہوئے کہا کہ "کالا دھن سے لڑنے کے لیے پی ایم نے نوٹ بندی کی بات کہی تھی، اس وقت آپ لائن میں کھڑے تھے، کیا کوئی کالا دھن والا لائن میں تھا؟ کیا کوئی ارب پتی لائن میں لگا تھا۔" انھوں نے کہا کہ اس دور میں آپ کی جیب سے پیسہ نکال کر بڑے صنعت کاروں کے قرض معاف کر دیئے گئے۔"

راہل گاندھی نے کہا کہ یہاں کے کسان مکئی اور دھان کی پیداوار کرتے ہیں، لیکن یہاں لوگوں کو مناسب قیمت نہیں مل پاتی۔ یہاں سے بچولیے کم قیمت میں اناج خرید کر اسے پنجاب اور ہریانہ میں اونچی قیمت پر فروخت کر دیتے ہیں۔ کانگریس لیڈر نے کہا کہ "پی ایم مودی کہتے ہیں کہ ہم نے کسان کو آزاد کیا کہ وہ اپنا مکئی، دھان ملک میں کہیں بھی جا کر فروخت کر سکتے ہیں۔ لیکن کسان کیسے فروخت کرے گا، بہار میں سڑک کہاں ہے۔ انھوں نے تو ارب پتیوں کو آزادی دی اور کسانوں و غریبوں کو غلام بنایا۔"

راہل گاندھی نے بہار کی جنتا دل یو-بی جے پی حکومت پر حملہ کرتے ہوئے کہا کہ "نتیش کمار نے گزشتہ پانچ سال میں بہار کے لیے کیا کیا؟ میں یہاں گارنٹی دینے آیا ہوں۔ میں یہ کہنا چاہتا ہوں کہ مہاگٹھ بندھن کی حکومت ہر ذات، طبقہ اور مذہب کی حکومت ہوگی۔" لوگوں کو روزگار ملے گا، کسانوں و نوجوانوں کو ان کا حق ملے گا۔

سماجوادی لیڈر شرد یادو کی بیماری کا تذکرہ کرتے ہوئے انھوں نے کہا کہ ان کی سیاست غریبوں کی سیاست ہے۔ انھوں نے بتایا کہ آندھرا پردیش میں شرد یادو سے ان کی ملاقات ہوئی تھی۔ انھوں نے سیاست کے بارے میں بہت کچھ سکھایا، اس طرح سے وہ میرے استاد ہیں۔ راہل گاندھی نے کہا کہ شرد یادو کی بیٹی سبھاسنی یادو اس انتخاب میں بہاری گنج سیٹ سے میدان میں ہیں۔ انھوں نے لوگوں سے سبھاسنی کو جتانے کی اپیل کی۔