فرضی پیدائش سرٹیفکیٹ معاملہ میں اعظم خان کی فیملی کو الٰہ آباد ہائی کورٹ سے ملی ضمانت
رامپور سے بی جے پی رکن اسمبلی آکاش سکسینہ نے جنوری 2019 میں اعظم خان، ان کی بیوی تنزین فاطمہ اور بیٹے عبداللہ اعظم کے خلاف فرضی پیدائش سرٹیفکیٹ سے متعلق کریمنل کیس درج کرایا تھا۔
![<div class="paragraphs"><p>تنزین فاطمہ، اعظم خان اور عبداللہ اعظم، تصویر آئی اے این ایس</p></div>](https://media.assettype.com/qaumiawaz%2F2020-11%2Ff7f63e0d-42e6-44b9-965f-dd63a6adbab7%2FAzam_Khan.jpg?rect=0%2C0%2C1200%2C675&auto=format%2Ccompress&fmt=webp)
تنزین فاطمہ، اعظم خان اور عبداللہ اعظم، تصویر آئی اے این ایس
سماجوادی پارٹی کے سینئر لیڈر اعظم خان اور ان کی فیملی کو فرضی پیدائش سرٹیفکیٹ معاملہ میں الٰہ آباد ہائی کورٹ نے بڑی راحت دی ہے۔ کنبہ کے تینوں اراکین (اعظم خان، ان کی بیوی تنزین فاطمہ اور بیٹے عبداللہ اعظم) کو عدالت سے ضمانت مل گئی ہے۔ عدالت نے اعظم خان کی سات سال کی سزا پر بھی روک لگا دی ہے۔ الٰہ آباد ہائی کورٹ کے اس فیصلے کے بعد تنزین فاطمہ اور عبداللہ اعظم جیل سے چھوٹ جائیں گے، لیکن اعظم خان نہیں چھوٹ پائیں گے کیونکہ وہ ایک دیگر معاملے میں سات سال کی سزا کاٹ رہے ہیں۔
قابل ذکر ہے کہ فرضی پیدائش سرٹیفکیٹ معاملہ میں رامپور سے بی جے پی رکن اسمبلی آکاش سکسینہ نے 3 جنوری 2019 کو اعظم خان، ان کی بیوی تنزین فاطمہ اور بیٹے عبداللہ اعظم کے خلاف کریمنل کیس درج کرایا تھا۔ تینوں کے خلاف رامپور کے گنج پولیس اسٹیشن میں تعزیرات ہند کی دفعات 193، 420، 467، 468 اور 471 کے تحت ایف آئی آر درج کرائی گئی تھی۔ آکاش کی طرف سے درج کرائی گئی ایف آئی آر کے مطابق اعظم خان اور ان کی بیوی تنزین نے بیٹے عبداللہ اعظم کا ایک پیدائش سرٹیفکیٹ 28 جون 2012 کو رامپور کے نگر پالیکا کونسل سے بنوایا تھا، جبکہ دوسرا پیدائش سرٹیفکیٹ 21 جنوری 2015 کو لکھنؤ میونسپل کارپوریشن سے جاری کرایا گیا۔
پہلے پیدائش سرٹیفکیٹ میں پیدائش کی جگہ رامپور بتائی گئی، جبکہ دوسرے سرٹیفکیٹ میں لکھنؤ واقع کوین میری اسپتال میں پیدائش ہونے کا تذکرہ ہے۔ الزام عائد کیا گیا کہ اعظم فیملی نے الگ الگ پیدائش سرٹیفکیٹ کا استعمال الگ الگ مقامات پر کیا۔ الگ الگ پیدائش سرٹیفکیٹ کی بنیاد پر دو پاسپورٹ اور دو پین کارڈ بنا کر ان کا غلط استعمال کرنے کی بھی بات سامنے آئی۔
بہرحال، اس معاملے میں رامپور پولیس نے جانچ مکمل ہونے کے بعد عدالت میں چارج شیٹ داخل کر دی۔ چارج شیٹ میں تعزیرات ہند کی دفعہ 120بی کے تحت فرد جرم داخل کیا گیا۔ اعظم خان نے بیوی تنزین فاطمہ وار بیٹے عبداللہ اعظم کے ساتھ اس معاملے میں 26 فروری 2020 کو رامپور کورٹ میں خود سپردگی کر دی۔ عدالت نے تینوں کو جیل بھیج دیا۔ اعظم خان کو اس معاملے میں الٰہ آباد ہائی کورٹ سے 27 ماہ بعد ضمانت ملی۔
رامپور کی خصوصی ایم پی-ایم ایل اے عدالت نے اس معاملے میں گزشتہ سال 18 اکتوبر کو اپنا فیصلہ سناتے ہوئے اعظم خان، ان کی بیوی تنزین فاطمہ اور بیٹے عبداللہ اعظم کو قصوروار قرار دیا اور تینوں کو سات سات سال قید اور پچاس پچاس ہزار روپے جرمانہ کی سزا سنائی۔ سزا سنائے جانے کے بعد اعظم فیملی کو پھر سے جیل جانا پڑا۔ پولیس نے اس معاملے میں آکاش سکسینہ سمیت گیارہ لوگوں کو گواہ بنایا تھا۔
اعظم خان اینڈ فیملی نے اس معاملے میں ملی سزا کے خلاف الٰہ آباد ہائی کورٹ میں کریمنل رویژن داخل کر سات سات سال کی سزا کو رد کرتے ہوئے سبھی کو بے قصور قرار دیے جانے کی گزارش کی۔ اس معاملے کی سماعت جسٹس سنجے کمار سنگھ کی سنگل بنچ کے سامنے ہوئی۔ آج عدالت نے اعظم خان اینڈ فیملی کے حق میں فیصلہ سناتے ہوئے انھیں ضمانت پر رہا کرنے کا حکم صادر کر دیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔