آتشی صحت خراب ہونے کے بعد داخل اسپتال، غیر معینہ بھوک ہڑتال ختم کر دی

نئی دہلی: دہلی کی پانی کی وزیر آتشی نے قومی دارالحکومت کے لئے پانی کے مطالبے زور دینے کے لئے پانچویں دن اپنی صحت خراب ہونے کے بعد منگل کو اپنی غیر معینہ بھوک ہڑتال ختم کر دی۔ آتشی کی بھوک ہڑتال فی الحال ختم کر دی گئی ہے اور وہ اسپتال کے آئی سی یو میں زیر علاج ہیں۔

عام آدمی پارٹی (عآپ) کے راجیہ سبھا رکن سنجے سنگھ نے کہا کہ وزیر آب آتشی پانچ دنوں سے غیر معینہ مدت کے لئے بھوک ہڑتال پر بیٹھی ہیں۔ ان کا ایک ہی مطالبہ ہے کہ دہلی کو اس کے حصہ کا پانی ملنا چاہیے۔ ہریانہ حکومت کے ساتھ ہمارے معاہدے کے تحت دہلی کو 613 ایم جی ڈی پانی ملنا چاہیے۔ لوک سبھا انتخابات کے نتائج کے بعد دہلی کو پچھلے تین ہفتوں سے لگاتار 100 ایم ڈی جی کم پانی دیا جا رہا ہے۔ یہ دہلی والوں کے حق کا پانی ہے۔ دہلی کو مقررہ کوٹہ کے مطابق پورا پانی فراہم کرنے کی فریاد کہیں نہیں سنی گئی۔

سنجے سنگھ نے کہا کہ آتشی پانی کے مسئلہ پر پچھلے پانچ دنوں سے ہڑتال پر تھیں۔ ان کی طبیعت خراب ہو رہی تھی، ڈاکٹر بار بار انہیں ہڑتال ختم کرنے کا مشورہ دے رہے تھے لیکن انہوں نے اپنی ہڑتال جاری رکھی۔ جس کی وجہ سے پیر کی رات ان کی طبیعت اچانک خراب ہونے لگی۔ ان کا بلڈ شوگر لیول 36 تک پہنچ گیا تھا جس کے بعد ڈاکٹروں نے انہیں فوری طور پر اسپتال میں داخل ہونے کا مشورہ دیا۔ آتشی کی حالت کو دیکھتے ہوئے انہیں ایل این جے پی اسپتال کے آئی سی یو میں داخل کرایا گیا۔ وہ اب بھی ایل این جے پی اسپتال کے آئی سی یو میں داخل ہیں۔ رات کو ان کی حالت بہت نازک تھی۔ ان کا علاج جاری ہے۔

اسی دوران عآپ کے راجیہ سبھا ایم پی این ڈی گپتا نے کہا کہ یہ نہ صرف عام آدمی پارٹی بلکہ ہر دہلی والوں کی درخواست ہے کہ ہریانہ اور مرکزی حکومت دہلی کو اس کے حق کا پانی دے۔ دہلی کے لوگ اپنے حق کا پانی مانگ رہے ہیں۔ ہماچل پردیش اور پنجاب پانی فراہم کرنے کے لیے تیار ہیں لیکن ان کی سرحدیں دہلی کے ساتھ نہیں ملتی ہیں۔ اس لیے یہ پانی صرف ہریانہ کے راستے دہلی آ سکتا ہے، مگر ہریانہ اس پانی کو دہلی نہیں آنے دے رہا ہے۔ ہم مرکزی اور ہریانہ حکومتوں سے درخواست کرتے ہیں کہ وہ اپنی ضد چھوڑیں اور دہلی کے لوگوں کو اپنے حصے کا پانی دیں۔

بھوک ہڑتال کے سلسلہ میں سنجے سنگھ نے کہا، ’’گی الحال بھوک ہڑتال موقوف کی جا رہی ہے، ہم اپوزیشن جماعتوں کو ساتھ لے کر پارلیمنٹ میں پانی کا مطالبہ کریں گے۔ گزشتہ چند دنوں سے موسم میں بہتری آئی ہے اور پانی کی مقدار بتدریج بڑھ رہی ہے۔ میں اس سلسلے میں وزیر اعظم کو خط بھی لکھ رہا ہوں تاکہ دہلی کو وہ پانی فراہم کیا جائے جس کی وہ حقدار ہے۔ لیفٹیننٹ گورنر نے بھی ہریانہ کے وزیر اعلیٰ سے بات کی تھی کہ دہلی کو پانی دیا جائے۔‘‘