ممتا کے بیان سے ناراض ہوئے اویسی، کہا ’وہ انسان پیدا نہیں ہوا جو اویسی کو خرید سکے‘

مغربی بنگال میں اسمبلی انتخاب کے دن جیسے جیسے قریب آ رہے ہیں، سیاسی بیانات کا سلسلہ دراز ہوتا جا رہا ہے۔ چونکہ اسدالدین اویسی کی پارٹی اے آئی ایم آئی ایم (آل انڈیا مجلس اتحادالمسلمین) نے بھی مغربی بنگال کی سیاست میں قدم رکھنے کا فیصلہ کر لیا ہے، اس لیے اویسی پر بھی حملے شروع ہو گئے ہیں۔ ریاست کی وزیر اعلیٰ ممتا بنرجی نے ایک بیان میں اویسی پر بی جے پی سے پیسے لینے اور مسلمانوں کا ووٹ تقسیم کرنے کا الزام عائد کر دیا، جس پر اویسی کافی ناراض نظر آ رہے ہیں۔ انھوں نے ممتا بنرجی پر جوابی حملہ کرتے ہوئے ببانگ دہل کہا ہے کہ ’’ابھی تک ایسا کوئی انسان پیدا نہیں ہوا جو اویسی کو خرید سکے۔‘‘

دراصل مغربی بنگال کے جلپائی گوڑی علاقہ میں منعقد ایک عوامی جلسہ سے خطاب کرتے ہوئے ممتا بنرجی نے بی جے پی اور اے آئی ایم آئی ایم دونوں کو تنقید کا نشانہ بناتے ہوئے بیان دیا تھا کہ ’’انھوں (بی جے پی) نے اقلیتوں کے ووٹوں کو تقسیم کرنے کے لیے حیدر آباد سے ایک پارٹی پکڑی ہے۔ بی جے پی نے انھیں پیسہ دیا ہے اور وہ ووٹ کی تقسیم کے لیے کام کرتے ہیں۔ بہار کے انتخابات میں بھی یہ دیکھا گیا ہے۔‘‘

ممتا بنرجی کے اسی بیان پر اسدالدین اویسی ناراض نظر آ رہے ہیں۔ انھوں نے ممتا بنرجی کے خلاف حملہ آور رخ اختیار کرتے ہوئے کہا کہ ’’مجھے کوئی نہیں خرید سکتا۔ ممتا بنرجی کے الزامات جھوٹے ہیں۔ ممتا بنرجی خود اپنے گھر میں ڈری ہوئی ہیں۔ ان کے کئی سارے لوگ بی جے پی میں شامل ہو رہے ہیں۔‘‘ ساتھ ہی اویسی نے ممتا بنرجی پر بہار کے ووٹروں کی بے عزتی کرنے کا الزام بھی عائد کیا۔ انھوں نے کہا کہ ’’ممتا نے بہار کے ان ووٹرس کی بے عزتی کی ہے جنھوں نے ہمیں ووٹ دیا۔‘‘