مغربی ایشیا میں بڑھتی کشیدگی کے درمیان ’ایئر انڈیا‘ نے اسرائیل کے لیے سبھی پروازیں روکنے کا کیا فیصلہ

ایران میں حماس کے سرکردہ لیڈر اسماعیل ہنیہ کے قتل کے بعد سے مغربی ایشیا میں کشیدگی عروج پر ہے۔ ایران نے ہنیہ کی موت کا بدلہ لینے کے لیے اسرائیل کو دھمکی بھی دے دی ہے اور اس لیے اسرائیل ہائی الرٹ پر ہے۔ ایسے حالات کو دیکھتے ہوئے ہندوستانی ہوابازی کمپنی ’ایئر انڈیا‘ نے ہندوستان اور اسرائیلی راجدھانی تل ابیب کے درمیان چلنے والی سبھی پروازوں کو روکنے کا فیصلہ کیا ہے۔

ایئر انڈیا نے ایک بیان جاری کر بتایا ہے کہ مغربی ایشیا کے حالات کو دیکھتے ہوئے ہم نے تل ابیب کے لیے مجوزہ پروازوں کو فوری اثر سے روکنے کا فیصلہ کیا ہے۔ تل ابیب سے یہاں آنے والی اور یہاں سے تل ابیب جانے والی ہوائی خدمات فی الحال 8 اگست 2024 تک روکی گئی ہے۔ ایئر انڈیا نے حالات پر لگاتار نظر بنائے رکھنے کی بات بھی کہی ہے۔

ایئر انڈیا سوشل میڈیا پر شیئر کردہ ایک پوسٹ میں لکھا ہے کہ ’’اس مدت (8 اگست 2024 تک) کے دوران جن مسافروں نے اپنے ٹکٹ بک کیے ہوئے ہیں، انھیں دوبارہ ٹکٹ بک کرانے پر ایک بار چھوٹ اور کینسلیشن چارج سے راحت دی جائے گی۔ اپنے مسافروں کی سیکورٹی ہماری پہلی ترجیح ہے۔‘‘

واضح رہے کہ ایران میں حماس کے سرکردہ لیڈر اسماعیل ہنیہ کا گزشتہ بدھ کے روز قتل کر دیا گیا تھا۔ حماس نے اس کے لیے اسرائیل پر الزام عائد کیا ہے۔ ایران نے بھی اس تعلق سے اسرائیل کو خمیازہ بھگتنے کی دھمکی دی ہے۔ اس کے جواب میں اسرائیل نے کہا کہ اگر کوئی کارروائی ہوئی تو اس کا سخت جواب دیا جائے گا۔ یعنی دونوں ممالک پیچھے ہٹنے کو تیار نہیں ہیں اور جنگ جیسے حالات بنتے ہوئے دکھائی دے رہے ہیں۔