عبداللہ اعظم کی ضمانت عدالت سے ہوئی منظور، لیکن جیل سے نہیں ہو سکے گی رِہائی!

سماجوادی پارٹی کے سرکردہ لیڈر اعظم خان کے بیٹے عبداللہ اعظم کو غیر قانونی پلاٹنگ کے ایک معاملے میں ایم پی-ایم ایل اے کورٹ سے ضمانت مل گئی ہے۔ سماعت کے دوران فریق دفاع کے وکیل کے ثبوتوں اور دلیلوں کی بنیاد پر انھیں عدالت سے ضمانت ملی ہے۔ حالانکہ وہ ابھی جیل سے باہر نہیں نکل پائیں گے کیونکہ کچھ قانونی پیچیدگیاں برقرار ہیں۔ عبداللہ کے وکیل کا کہنا ہے کہ اس معاملے میں ہائی کورٹ سے ضمتن ملنے کے بعد ہی وہ باہر آ سکتے ہیں۔

قابل ذکر ہے کہ اس وقت عبداللہ اعظم اتر پردیش کے ہردوئی واقع ضلع جیل میں بند ہیں۔ انھیں جیل کے بیرک نمبر 21 میں رکھا گیا ہے۔ ہردوئی میں ہی اعظم خان کی سسرال اور عبداللہ اعظم کا نانیہال بھی ہے۔ اس سے ملحق سیتاپور جیل میں اعظم خان بکری چوری سمیت دیگر معاملوں میں سزا کاٹ رہے ہیں۔

بہرحال، عبداللہ اعظم کے وکیل زبیر احمد خاں نے بتایا کہ وہ دو پیدائش سرٹیفکیٹ کے معاملے سمیت نگر پالیکا کی سویپ مشینوں کی جوہر یونیورسٹی میں برآمد اور ندی کی زمین پر غیر قانونی پلاٹنگ کے معاملے میں سنائی گئی سزا کو کاٹ رہے ہیں۔ ان معاملوں میں سے ندی کی زمین پر غیر قانونی پلاٹنگ کے معاملے میں انھیں 16 اگست کو ایم پی-ایم ایل اے مجسٹریٹ کورٹ سے ضمانت مل گئی ہے۔ کچھ قانونی دقتیں برقرار ہیں، اس لیے ان کا جیل سے نکلنا مشکل ہے۔ وہ اس کے لیے ہائی کورٹ میں ضمانت ملنے کا انتظار کر رہے ہیں۔ اس کے بعد ہی وہ باہر آ سکتے ہیں۔