تلنگانہ: بی آر ایس کی میٹنگ میں شامل ہونے والے 106 سرکاری ملازمین معطل، ضابطہ اخلاق کی خلاف ورزی میں پھنسے

تلنگانہ کے سدی پیٹ ضلع میں بی آر ایس (بھارتیہ راشٹر سمیتی) کی میٹنگ میں حصہ لینے والے 106 سرکاری ملازمین کو معطل کر دیا گیا ہے۔ یہ سبھی ملازمین انتخابی ضابطہ اخلاق کی خلاف ورزی کرتے ہوئے 7 اپریل کو میدک پارلیمانی حلقہ کے سدی پیٹ واقع ریڈی فنکشن ہال میں بی آر ایس کی میٹنگ میں شریک ہوئے تھے۔

سدی پیٹ ضلع الیکٹورل افسر اور کلکٹر ایم منو چودھری نے ان ملازمین کے بی آر ایس کی میٹنگ میں شامل ہونے کو ضابطہ اخلاق کی خلاف ورزی تصور کرتے ہوئے ضلع دیہی ڈیولپمنٹ ایجنسی سدی پیٹ، ایم جی این آر ای جی ایس اور ایس ای آر پی کے 106 اسٹاف اراکین کو معطل کر دیا۔

یہ کارروائی تب کی گئی جب بی جے پی کے سابق رکن اسمبلی اور میدک لوک سبھا سیٹ سے پارٹی امیدوار رگھونندن یادو نے اسسٹنٹ ریٹرننگ افسر اور ریونیو بورڈ افسر کو فون پر شکایت کی۔ انھوں نے جانکاری دی کہ ڈی آر ڈی اے ملازمین لوک سبھا انتخاب سے متعلق بی آر ایس کی ایک میٹنگ میں حصہ لے رہے ہیں۔ اس خبر پر ایک اڑن دستہ کی ٹیم نے میٹنگ والی جگہ کا دورہ کیا اور پایا کہ 15-10 لوگ اب بھی میٹنگ میں موجود ہیں۔ اس نے انتظامیہ سے سی سی ٹی وی فوٹیج حاصل کیا جس سے پتہ چلا کہ بی آر ایس نے اسسٹنٹ ریٹرننگ افسر، سدی پیٹ سے اجازت حاصل کیے بغیر میٹنگ منعقد کی تھی۔ بی آر ایس کے دو لیڈران کے خلاف پولیس میں شکایت بھی درج کی گئی ہے۔

سی سی ٹی وی فوٹیج کی بنیاد پر الیکٹورل افسران نے میٹنگ میں حصہ لینے والے ڈی آر ڈی اے کے 40 ملازمین کی شناخت کی۔ بعد میں دیگر 66 ملازمین کی بھی شناخت کی گئی۔ سبھی 106 اسٹاف اراکین کو فوری اثر سے معطل کر دیا گیا ہے۔ ان سرکاری ملازمین کی اس حرکت کو انتخابی ضابطہ اخلاق کی خلاف ورزی مانا گیا ہے۔