تازہ انتخابی سرو وں میں جو بائیڈن کو ٹرمپ پر 10 پوائنٹس کی سبقت

واشنگٹن: امریکہ کے لئے ڈیموکریٹک صدارتی امیدوار جو بائیڈن انتخابات سے قبل حالیہ سروے میں صدر ڈونالڈ ٹرمپ کو 10 فیصد پوائنٹس کی برتری کے ساتھ آگے چل رہے ہیں۔ ’این بی سی نیوز‘ اور ’وال اسٹریٹ جرنل‘ کی جانب سے کرائے گئے قومی سطح کے سروے کے مطابق جو بائیڈن کو 52 فیصد لوگوں کی حمایت حاصل ہے جبکہ 42 فیصد لوگوں نے ٹرمپ کی حمایت کی ہے۔

امریکہ کی ایریزونا، فلوریڈا، جارجیا، اووا، مینے، مشیگن، مینی سوٹا، نارتھ کیرولینا، نیو ہیمپشائر، نیوادا، پنسلوینیا اور وسکونسن سمیت 12 ریاستوں میں ہونے والے آخری سروے کے مطابق جو بائیڈن نے 51 فیصد جبکہ ڈونالڈ ٹرمپ نے 45 فی صد ووٹ حاصل کیے۔

مذکورہ تازہ ترین انتخابی سروے 29 اکتوبر سے 31 اکتوبر کے درمیان کیے گئے تھے۔ سروے میں جو بائیڈن سیاہ فام امریکی شہریوں کی حمایت حاصل کرتے دکھائی دیتے ہیں۔ اس کے علاوہ نوجوانوں، سینئر شہریوں اور خواتین نے بھی بڑی تعداد میں ڈیموکریٹک پارٹی کے امیدوار کی حمایت کی ہے۔

واضح رہے کہ یہ ایک واضح برتری ہے اگر سروے کے ان رجحانات کے مطابق امریکی عوام نے ووٹنگ کی تو ٹرمپ کو شکست ہونا طے ہے۔ امریکہ میں ان نتائج کو لے کر ایک خوف کا ماحول بھی نظر آ رہا ہے کیونکہ ٹرمپ کے حامی اور مخالفین دونوں میں انتہائی شدت نظر آ رہی ہے۔ ادھر خبریں ہیں کہ امریکہ میں ووٹنگ سے پہلے ہتھیاروں کی بکری میں بہت زیادہ اضافہ دیکھنے کو مل رہا ہے جو ایک تشویش کا پہلو ہے۔