کپتان روہت شرما سمیت ہندوستانی ٹیم کے تین زخمی کھلاڑی بنگلہ دیش کے خلاف یک روزہ سیریز سے باہر

ہندوستانی کرکٹ ٹیم اس وقت بنگلہ دیش میں ہے اور تین میچوں کی یک روزہ سیریز میں 0-2 سے پیچھے ہے۔ آخری میچ 10 دسمبر کو کھیلا جائے گا، لیکن اس سے قبل ایک بری خبر سامنے آئی ہے کہ کپتان روہت شرما آخری میچ نہیں کھیل پائیں گے۔ روہت شرما ہی نہیں، مزید دو ہندوستانی کھلاڑی بھی بنگلہ دیش کے خلاف یک روزہ سیریز سے زخمی ہونے کے سبب باہر ہو چکے ہیں۔

بنگلہ دیش کے خلاف لگاتار دو یک روزہ میچ ہارنے اور سیریز گنوانے کے بعد روہت شرما کے تیسرے یک روزہ میچ میں کھیلنے کو لے کر پہلے ہی خدشات ظاہر کیے جا رہے تھے، لیکن تیز گیندباز دیپک چاہر اور کلدیپ سین بھی آخری یک روزہ میچ سے باہر ہو گئے ہیں۔ یہ جانکاری ہندوستانی ٹیم کے کوچ راہل دراوڑ نے دی ہے۔

قابل ذکر ہے کہ بنگلہ دیش کے خلاف کھیلے گئے دوسرے یک روزہ میچ میں روہت شرما، دیپک چاہر اور کلدیپ سین زخمی ہو گئے تھے۔ اس میچ میں ہندوستانی ٹیم کو 5 رنوں سے شکست کا سامنا بھی کرنا پڑا تھا۔ انگوٹھا میں چوٹ لگنے اور خون نکلنے کے باوجود اس میچ میں روہت شرما بلے بازی کرنے اترے تھے اور تیز طرار ناٹ آؤٹ 51 رن بنائے تھے، لیکن ہندوستان کو جیت نہیں دلا سکے تھے۔

بہرحال، راہل دراوڑ کا کہنا ہے کہ تینوں کھلاڑی ممبئی واپس آئیں گے جہاں ایکسپرٹ ان کی جانچ کریں گے۔ اس کے بعد ہی پتہ چلے گا کہ وہ ٹیسٹ سیریز کے لیے دستیاب رہ پائیں گے یا نہیں۔ لیکن یہ پختہ ہے کہ تینوں سیریز کا آخری یک روزہ میچ نہیں کھیل پائیں گے۔