آئی پی ایل 2024: کولکاتا اور حیدر آباد کے درمیان فائنل مقابلہ سے پہلے میتھیو ہیڈن اور کیون پیٹرسن نے کی پیشین گوئی
آسٹریلیا کے سابق سلامی بلے باز میتھیو ہیڈن اور انگلینڈ کے سابق بلے باز پیٹرسن نے کولکاتا کو مضبوط ٹیم بتایا ہے، ان دونوں نے ہی کولکاتا کے خطاب جیتنے کی حمایت کی ہے۔
![<div class="paragraphs"><p>تصویر @IPL</p></div>](https://media.assettype.com/qaumiawaz%2F2023-04%2Fa3082f40-b37a-4038-a165-4c4e655a6df2%2FVarun_Chakraverthy.jpg?rect=0%2C0%2C1200%2C675&auto=format%2Ccompress&fmt=webp)
تصویر @IPL
سنرائزرس حیدر آباد نے جمعہ کے روز کوالیفائر 2 میں راجستھان رائلس کو 36 رنوں سے ہرا کر کولکاتا نائٹ رائیڈرس کے خلاف کھیلنے کے لیے آئی پی ایل فائنل میں جگہ بنا لی ہے۔ اب خطابی مقابلے سے پہلے آسٹریلیا کے سابق بلے باز میتھیو ہیڈن اور انگلینڈ کے سابق بلے باز کیون پیٹرسن نے پیشین گوئی کرتے ہوئے کولکاتا کو چمپئن ٹیم بتایا ہے۔ ان دونوں ہی کھلاڑیوں نے کولکاتا کی حمایت کرتے ہوئے کہا ہے کہ یہ ٹیم انتہائی مضبوط ہے۔
قابل ذکر ہے کہ کوالیفائر 1 میں کولکاتا نے احمد آباد میں حیدر آباد کو آٹھ وکٹ سے ہرا کر فائنل کا ٹکٹ حاصل کیا تھا۔ دونوں ٹیموں نے ایک دوسرے کے خلاف میچ کر رواں ٹورنامنٹ کی شروعات کی تھی اور اس میچ میں بھی کولکاتا نے چار رنوں سے جیت حاصل کی تھی۔ یہی وجہ ہے کہ کولکاتا زیادہ مضبوط دکھائی دے رہی ہے۔
بہرحال، میتھیو ہیڈن کو لگتا ہے کہ کولکاتا کی اسپن جوڑی سنیل نرائن اور ورون چکرورتی میچ میں بہت اثر ڈالیں گے۔ کولکاتا کے لیے موجودہ سیزن میں اسپنرس نے 36 وکٹ لیے ہیں۔ ہینڈن نے اس تعلق سے اسٹار اسپورٹس کرکٹ لائیو پر کہا کہ ’’مجھے پورا یقین ہے کہ کولکاتا یہاں جیتے گی۔ اس پچ پر نارائن اور چکرورتی کی بہترین اسپن سے فرق پرے گا۔‘‘
دوسری طرف پیٹرسن کا کہنا ہے کہ کولکاتا کے خلاف حیدر آباد کی آخری ہار بھی فائنل میں کافی حوصلہ دے گا، لیکن پیٹ کمنس کی قیادت والی ٹیم کے خطابی مقابلہ یعنی فائنل میں پہنچنے پر انھیں خوشی ہے۔ پیٹرسن کا کہنا ہے کہ ’’احمد آباد میں سنرائزرس نے جس طرح سے شکست کا سامنا کیا، وہ مجھے پسند نہیں آیا اور مجھے لگتا ہے کہ یہ انھیں اتوار کی شروعات میں بیک فٹ پر دھکیل دے گا۔ کولکاتا کو فائنل میں کافی حوصلہ ملے گا، کیونکہ اس نے کچھ دن پہلے ہی حیدر آباد کو ہرایا ہے۔‘‘
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔