ہندوستان اور انگلینڈ کے درمیان ٹیسٹ چمپئن شپ کے فائنل میں پہنچنے کی جنگ کل سے

چنئی: ہندوستان اور انگلینڈ کے مابین جمعہ سے ایم چدمبرم اسٹیڈیم میں چار ٹسٹ میچوں کی سیریز میں دونوں ٹیمیں آئی سی سی عالمی ٹسٹ چیمپئن شپ کے فائنل میں اپنی جگہ یقینی بنانے کے ارادے سے اتریں گی ہندوستان اور انگلینڈ اپنی گزشتہ سیریز جیت کر اس مقابلے میں بلند حوصلہ کے ساتھ اتر رہی ہیں۔ چنئی میں پہلے دونوں ٹسٹ کھیلے جائیں گے۔ یہ سیریز عالمی چیمپئن شپ کے لحاظ سے کافی اہم ہے اور دونوں ہی ٹیموں کے لئے فائنل میں جگہ بنانے کا آخری موقع ہے۔ ہندوستان نے اپنی گزشتہ سیریز میں آسٹریلیا کو اسی کی سرزمین پر دو۔ایک سے شکست دی تھی جبکہ انگلینڈ کی ٹیم سری لنکا کو دو۔صفر سے کلین سویپ کرکے ہندوستان پہنچی ہے۔

ہندوستان اس وقت آئی سی سی ورلڈ ٹیسٹ چیمپیئن شپ میں پہلے نمبر پر ہے جبکہ انگلینڈ کی ٹیم نیوزی لینڈ اور آسٹریلیا کے بعد چوتھے نمبر پر ہے۔ آسٹریلیا نے جنوبی افریقہ کا اپنا آئندہ دورہ ملتوی کر دیا ہے جس سے دوسرے نمبر پر موجود نیوزی لینڈ نے فائنل میں جگہ بنالی ہے۔ فائنل کی دوسری پوزیشن کی ٹیم کے لئے مقابلہ اب تین ٹیموں ہندوستان، آسٹریلیا اور انگلینڈ تک محدود ہوگیا ہے۔ ہندوستان اور انگلینڈ سیریز سے ہی فائنل کی دوسری ٹیم کا فیصلہ ہوگا، جو رواں سال جون میں انگلینڈ کے لارڈز گراؤنڈ میں کھیلا جانا ہے۔ ہندوستان-انگلینڈ سیریز کا نتیجہ ہی طے کرے گا کہ ان تین ٹیموں میں سے کون سی ٹیم فائنل میں پہنچے گی۔

ہندوستان نومبر 2019 میں کولکتہ کے ایڈن گارڈن گراؤنڈ میں بنگلہ دیش کے خلاف ڈے نائٹ ٹسٹ کھیلنے اور کورونا وبا کے بعد گھریلو سرزمین پر اپنا پہلا ٹیسٹ کھیل رہا ہے۔ ہندوستان کے تمام بڑے کھلاڑی چند کھلاڑیوں کے علاوہ سبھی فٹ ہیں اور وراٹ کوہلی کی کپتانی میں ٹیم انڈیا کو انگلینڈ کو چیلنج دینے کے لئے ایک مضبوط الیون کا منتخب کرنا ہوگا۔ جب ہندوستان نے آسٹریلیا کے شہر برسبین میں چوتھا اور آخری ٹیسٹ جیتا تو اس کے بہت سے اہم کھلاڑی زخمی ہوکر میچ سے باہر ہوگئے تھے اور برسبین کے گابا گراؤنڈ میں ہندوستان نے تاریخی فتح حاصل کی تھی۔

ٹیم انڈیا نے پہلے ٹیسٹ کے لئے حتمی الیون کا اعلان نہیں کیا ہے۔ توقع کی جارہی ہے کہ سلامی بلے بازی کے لئے روہت شرما کے ساتھ شبھمن گیل کے رہنے کی پوری امید ہے جنہوں نے آسٹریلیا میں بہت عمدہ کارکردگی کا مظاہرہ کیا۔ چیتشور پجارا تیسرے نمبر پر موجود ہوں گے جبکہ باقاعدہ کپتان وراٹ چوتھے نمبر پر واپسی کریں گے۔ آسٹریلیا میں تین میچوں کی کپتانی کرنے والے اجنکیا رہانے پانچویں نمبر پر موجود رہیں گے۔

وکٹ کیپر کے لئے رِدھمن ساہا اور رشبھ پنت کے بیچ ایک بار پھر مقابلہ رہے گا ۔ اگرچہ پنت نے گابا گراؤنڈ پر میچ وننگ اننگز کھیلی تھی، لیکن ان کی وکٹ کیپنگ میں ابھی بھی خامیاں ہیں اور ساہا ہندوستان کی اسپن کی مددگار پچوں پر اسپنرز کے سامنے وکٹوں کے پیچھے زیادہ کارگر ثابت ہوسکتے ہیں۔ اگر ہندوستانی ٹیم تین اسپنرز کے ساتھ اترنے کا فیصلہ کرتی ہے تو ساہا کو ان کی بہتر وکٹ کیپنگ کی وجہ سے ترجیح ملے گی۔

آف اسپنر روی چندرن اشون کا کھیلنا طے ہے اور اگر ہندوستان تین اسپنرز کے ساتھ اترنا چاہتا ہے تو چائنامین گیندباز کلدیپ یادو کو موقع مل سکتا ہے۔ کلدیپ آسٹریلیا میں ایک ٹیسٹ بھی نہیں کھیل سکے تھے۔ تیسرے اسپنر کے لئے اسپن آل راؤنڈر واشنگٹن سندر اور اکشر پٹیل کے بیچ مقابلہ رہے گا۔ سندر آف اسپن گیندبازی کرتے ہیں جبکہ پٹیل لیفٹ آرم اسپنر ہیں۔

ہندوستان کے دونوں ٹاپ تیزگیندباز ایشانت شرما اور جسپریت بمراہ مکمل طور پر فٹ ہیں اور چنئی میں وہ انگلینڈ کے سامنے سخت چیلنج پیش کریں گے۔ ایشانت آسٹریلیا کے دورے میں نہیں کھیلے تھے جبکہ بمراہ کو چوتھے ٹیسٹ سے باہر کر دیا گیا تھا۔ اگر تیسرے تیزگیندباز کو موقع دینے کی بات سامنے آئی تو محمد سراج کی دعویداری مضبوط ہوگی اور کلدیپ یادو کو بھی باہر بیٹھنا پڑ سکتا ہے۔

ہندوستان کے چوٹی کے تیزگیندباز ایشانت شرما نے حال ہی میں دہلی کی جانب سے سید مشتاق علی ٹرافی کھیل کر اپنی میچ فٹ نیس ثابت کی تھی۔ ایشانت 300 ٹسٹ وکٹ حاصل کرنے والے ہندوستان کے چھٹے تیزگیندباز بننے سے تین وکٹ دور ہیں۔ اگر بمراہ چنئی ٹسٹ میں کھیلنے اترتے ہیں تو طویل فارمیٹ میں ہندوستان کی سرزمین پر یہ ان کا پہلا ٹسٹ ہوگا۔ 2018 میں کیپ ٹاؤن میں ٹیسٹ ڈیبیو کرنے کے بعد انہوں نے اپنے تمام 17 ٹیسٹ غیر ملکی سرزمین پر کھیلے ہیں۔

انگلینڈ کو پہلا ٹسٹ شروع ہونے سے جیک کراولی کے زخمی ہونے کے سبب پہلے دو ٹسٹ سے باہر ہونے کی وجہ سے گہرا جھٹکا لگا ہے۔ کلائی کی انجری کے سبب کرولی چنئی میں کھیلے جانے والے پہلے دو ٹیسٹ میچوں میں باہر ہوگئے ہیں۔ انگلینڈ نے اولی پوپ کو ٹیم میں شامل کیا ہے تاکہ ٹیم کے ٹاپ آرڈر میں توازن برقرار رہے۔ سری لنکا کے دورے میں ڈبل سنچری اور ایک سنچری بنانے والے کپتان جو روٹ کا 100 واں ٹیسٹ ہوگا۔ روٹ نے ہندوستان میں ٹیسٹ کیریئر کا آغاز 2012 میں ناگپور میں کیا تھا اور اب وہ ہندوستان میں ہی اپنا 100 واں ٹیسٹ کھیلنے جا رہے ہیں۔ انگلینڈ نے سری لنکا میں آسانی سے دونوں ٹیسٹ جیت لئے تھے۔ تاہم ان دونوں ٹیسٹوں میں ان کے سرکردہ آف اسپنر معین علی کورونا کی وجہ سے باہر رہے تھے لیکن اب وہ فٹ ہیں اور انگلینڈ کے اسپن حملہ کو سنبھالیں گے۔

انگلینڈ کے تیزگیندباز جوفرا آرچر سے مضبوطی ملے گی جو سری لنکا میں نہیں کھیل سکے تھے۔ آرچر کا ساتھ دینے کے لئے اسٹورٹ براڈ موجود رہیں گے۔ ٹیم کے پاس بین اسٹوکس اور جوس بٹلر کی شکل میں دو انتہائی تجربہ کار اور اسٹار کھلاڑی ہیں جو ہندوستانی ٹیم کے لئے مشکلات پیدا کرسکتے ہیں۔ ہندوستان کی طرح انگلینڈ کی بھی نگاہیں ورلڈ چیمپین شپ کے فائنل میں جگہ بنانے پر ہیں۔ دونوں ٹیموں کے مابین یہ میچ سیریز کی سمت کا فیصلہ طے کرے گا اور اس بات کا بھی پتہ چلے گا کہ کون سی ٹیم فائنل میں جگہ بنانے کے لئے تیار ہے۔