سپریم کورٹ نے انڈین فٹبال فیڈریشن کی کمیٹی آف ایڈمنسٹریٹرس کو کیا تحلیل

سپریم کورٹ نے پیر کے روز آل انڈیا فٹبال فیڈریشن (اے آئی ایف ایف) کے معاملوں کا انتظام و دیکھ رہی کمیٹی آف ایڈمنسٹریٹرس (سی او اے) کو تحلیل کر دیا ہے اور اس کے حکم کو رد کرتے ہوئے 28 اگست کو ہونے والے اے آئی ایف ایف انتخاب کو ایک ہفتہ کے لیے ملتوی کر دیا ہے۔ اب نئے اصولوں کے ساتھ انتخابات ہوں گے۔

جسٹس ڈی وائی چندرچوڑ اور اے ایس بوپنا کی بنچ نے سی او اے کو ختم کر دیا اور روزانہ کے انتظام کی ذمہ داری اے آئی ایف ایف کے کارگزار جنرل سکریٹری کے حوالے کر دیا ہے۔ عدالت نے کہا کہ آئندہ انتخاب کے لیے اے آئی ایف ایف کی ایگزیکٹیو کونسل میں 23 اراکین ہوں گے، جن میں سے 17 اراکین الیکٹورل کالج کے ذریعہ منتخب کیے جائیں گے اور 6 اراکین مشہور کھلاڑیوں میں سے ہوں گے۔

سپریم کورٹ کی بنچ نے کہا کہ وہ فیفا کے ذریعہ اے آئی ایف ایف کی منسوخی کو رد کرنے اور ہندوستان میں مشہور فیفا انڈر-17 خاتون عالمی کپ منعقد کرنے اور ہندوستانی کھلاڑیوں اور ٹیموں کو بین الاقوامی انعقادات میں حصہ لینے کی اجازت دینے کے لیے حکم جاری کر رہی ہے۔ عدالت عظمیٰ نے کہا کہ ریٹرننگ افسر (آر او)، جنھیں مقرر کیا گیا ہے، انھیں اس کے ذریعہ مقرر آر او مانا جائے گا، کیونکہ انتخاب لڑنے والے فریقین کے ذریعہ کوئی اعتراض درج نہیں کیا گیا ہے اور انتخابی پروگرام کو ایک ہفتہ کی مدت کے لیے آگے بڑھا کر ترمیم کرنے کی اجازت ہے۔ بنچ نے کہا کہ آنے والے انتخاب کے لیے ووٹر لسٹ میں ریاستوں/مرکز کے زیر انتظام خطوں کی نمائندگی کرنے والے 36 رکن فیڈریشن میں شامل ہوں گے۔