انگلینڈ: اکتوبر سے شائقین کو اسٹیڈیم میں انٹری ملنے کی امید

لندن: کورونا بحران کے درمیان انگلینڈ کی حکومت نے ’پائلٹ پروجیکٹ‘ کے ذریعہ اکتوبر میں اسٹیڈیم میں شائقین کو داخلہ دینے کے ساتھ کھیلوں کو شروع کرنے کا منصوبہ بنایا ہے۔ انگلینڈ میں جون کے مہینے سے ناظرین کے بغیر اسنوکر، فٹ بال، کرکٹ سمیت کچھ کھیلوں کو شروع کردیا گیا ہے۔

انگلینڈ کے وزیراعظم بارس جانسن نے کہا ’ ہم اکتوبر سے اسٹیڈیم میں ناظرین کو داخلہ دینے کے ساتھ ہی بزنس پروگرام سمیت کچھ ضروری کانفرنس کی اجازت دے سکتے ہیں۔ انہوں نے اس بات پر بھی زور دیا کہ یہ سب پوری طرح سے محفوظ ماحول اور پائلٹ پروجیکٹ کے تحت ہوگا۔

انگلینڈ سے ہی 117 روز بعد انٹرنیشنل کرکٹ کی بھی واپسی ہوئی ہے۔ مارچ میں عائد لاک ڈاون کے بعد انگلینڈ میں جون سے فٹ، کرکٹ سمیت کئی گیمز ناظرین کے بغیر شروع ہوچکے ہیں۔ یہاں ویسٹ انڈیز کے ساتھ آٹھ جولائی سے تین ٹیسٹ میچوں کی سیریز کھیلی جارہی ہے جبکہ دوسرا ٹسٹ 16 جولائی سے مینچسٹر میں کھیلا جارہا ہے۔

رپورٹ کے مطابق آزمائش کے طور پر جولائی کے آخر یا اگست کے شروعات میں محدود تعداد میں شائقین کو اسٹیڈیم میں داخلے کی اجازت دی جاسکتی ہے۔ ٹرائل کے طور پر دو مرد کاؤنٹی کرکٹ دوستانہ میچ، 31 جولائی سے عالمی اسنوکر چیمپئن شپ اور یکم اگست سے ہارس ریسنگ فیسٹیول میں یہ ٹرائل کیا جاسکتا ہے۔