سریجیش کو پرچم بردار بنانے کی تجویز پیش کرنے پر نیرج چوپڑاکا دل جیتنے والا بیان

گزشتہ 15 دنوں سے جاری اولمپک 2024 گیمز کی اختتامی تقریب پیرس میں ہو ئی۔ ہندوستانی وقت کے مطابق 12:30 بجے شروع ہونے والے اس بے مثال ایونٹ میں ہندوستان  نےبھی حصہ لیا ۔ ہندوستان نے اختتامی تقریب میں مشہور ہاکی گول کیپر پی آر سریجیش اور اسٹار شوٹر کانسے کے دو تمغے جیتنے والی منو بھاکر کے ناموں کو اپنے پرچم برداروں کے طور پر منتخب کیا ۔

ہندوستان کی منو بھاکر اور پی آر سریجیش اولمپکس کی اختتامی تقریب میں اسٹیڈیم میں موجود رہے۔ دونوں ترنگا لے کر اسٹیڈیم پہنچے۔ منو نے اس سال پیرس میں تاریخ رقم کی اور ایک اولمپکس میں دو تمغے جیتنے والی پہلی ہندوستانی کھلاڑی بن گئیں۔۔ ٹوکیو کے بعد سریجیش نے پیرس میں بھی ہندوستانی ہاکی کے لیےشاندار کھیل کا مظاہرہ کیا۔

واضح رہے کہ پی آر سریجیش کے لیے یہ آخری اولمپک تھا۔ اس سلسلے میں انہیں پرچم بردار بننے کا اعزاز بھی دیا گیا ہے۔ سریجیش کے نام پر حتمی مہر لگانے سے پہلے انڈین اولمپک ایسوسی ایشن کی صدر پی ٹی اوشا نے نیرج چوپڑا سے بھی بات کی اور کہا کہ چونکہ یہ سریجیش کا آخری اولمپکس ہے اس لیے انہیں پرچم بردار بننے کا اعزاز دیا جانا چاہیے۔

اس کے جواب میں جیولین تھرو کے اسٹار کھلاڑی نیرج چوپڑا نے کہا کہ وہ خود چاہتے ہیں کہ پیرس اولمپکس کے بعد ریٹائر ہونے والے ہاکی کھلاڑی کو ہی یہ اعزاز ملے۔ گزشتہ اولمپک کھیلوں میں سونے کا تمغہ جیتنے والے نیرج چوپڑا نے پیرس اولمپکس میں چاندی کا تمغہ جیتا ہے۔

پی ٹی اوشا نے ایک بیان میں کہا کہ اس نے نیرج سے اس بارے میں بات کی ہے۔ اس نے کہا، 'میں نیرج کی اسپورٹس مین شپ کی تعریف کرتی ہوں کیونکہ اس نے اس بات پر اتفاق کیا کہ سریجیش کو اختتامی تقریب میں پرچم بردار بنایا جانا چاہیے۔'اوشا نے کہا، 'نیرج نے مجھے بتایا کہ میڈم، اگر آپ مجھ سے نہ بھی پوچھتی تو میں سریجیش بھائی کا نام ہی بتاتا ۔ اس سے ظاہر ہوتا ہے کہ نیرج ہندوستانی کھیلوں میں سریجیش کے تعاون کا کتنا احترام کرتے ہیں۔‘