ٹوکیو اولمپکس میں ہندوستان کا چوتھا میڈل، روی کمار دہیا کشتی کے فائنل میں داخل، چاندی کا تمغہ یقینی

ٹوکیو: ہندوستانی پہلوان روی کمار نے بدھ کے روز یہاں مردوں کے فری اسٹائل 57 کلو زمرے کے کشتی مقابلہ کے سیمی فائنل میں قزاکستان کے پہلوان نور سلام سنایاو کو ہرا کر فائنل میں داخلہ حاصل کر لیا۔ روی کمار اگر فائنل میں ہار بھی جاتے ہیں تو بھی وہ ہندوستان کے لئے چاندی کا تمغہ ضرور حاصل کر لیں گے۔

روی کمار شروعات میں اس مقابلہ میں 7-9 سے پچھڑ رہے تھے۔ دریں اثنا، نور سلام زخمی ہو گئے، جس کا فائدہ روی کمار کو حاصل ہوا۔ زخمی ہونے کے سبب قزاکستان کے پہلوان کو چیلنج واپس لینا پڑا اور 7-9 پر رہنے کے باوجود روی کمار فتحیاب قرار دیئے گئے۔

قبل ازیں، لولینا بورگوہین مکہ بازی کے سیمی فائنل مقابلہ میں ترکی کی بوسیناز سومینیلی سے ہار گئیں لیکن انہوں نے بھی کانسہ کا تمغہ حاصل کر لیا۔ روی کمار کی جیت کے ساتھ ہندوستان کے کھاتے میں 4 میڈل ہو گئے ہیں۔ روی کمار کے علاوہ میرا بائی چانو نے ویٹ لفٹنگ میں، پی وی سندھو نے بیڈمنٹن اور لولینا بورگوہین نے مکہ بازی میں تمغہ حاصل کیا ہے۔

تاریخ رقم کر چکی ہندوستان کی ہاکی ٹیم بھی کچھ دیر میں ارجنٹائن سے سیمی فائنل مقابلہ کرنے جا رہی ہے۔ اگر خاتون ٹیم یہ میچ جیت جاتی ہے تو ہندوستان کا ایک اور تمغہ یقینی ہو جائے گا۔