بین الاقوامی خلائی اسٹیشن میں پھنسی سنیتا ولیمس کی ویڈیو آئی سامنے، ہوا میں لہراتے بال اور چہرے پر تھی خوشی

ہند نژاد امریکی خلاباز سنیتا ولیمس اور بوچ ولمور ہفتوں سے بین الاقوامی خلائی اسٹیشن میں پھنسے ہوئے ہیں۔ انھیں اب تک زمین پر واپس آ جانا چاہیے تھا، لیکن فی الحال کچھ بھی یقینی نہیں کہ وہ کب تک واپس آئیں گے۔ سائنسداں فکر مند ہیں کیونکہ جس کیپسول دونوں کو واپس آنا تھا، اس میں موجود تکنیکی خامی کو دور کرنے کی کوششیں اب تک کامیاب نہیں ہوئی ہے۔ حالانکہ سنیتا ولیمس اور بوچ ولمور نے ایک پریس کانفرنس کر سبھی کی تشویش کو دور کر دیا ہے۔ اس ویڈیو میں سنیتا ولیمس کے بال لہرا رہے ہیں اور ان کے چہرے پر خوشی ظاہر ہو رہی ہے۔

دراصل بین الاقوامی خلائی اسٹیشن پر ڈاکنگ کے بعد پہلی پریس کانفرنس کرتے ہوئے سنیتا ولیمس اور ولمور نے کہا کہ انھیں پورا یقین ہے کہ بوئنگ اسٹارلائنر کیپسول انھیں گھر لے آئے گا۔ ولمور نے کہا کہ ’’میں پوری طرح (گھر واپسی کا) یقین کرتا ہوں اور ناکام ہونے کا تو کوئی متبادل ہی نہیں ہے، اس لیے ہم رُک رہے ہیں۔‘‘ اس درمیان ولمور نے اس بات کا اعتراف کیا کہ ناسا اور بوئنگ کی طرف سے زمین پر تھرسٹر تجربات کی ہو رہی جانچ ان کی واپسی کے لیے بہت اہم ہے۔

واضح رہے کہ ناسا کے دونوں خلائی مسافر 5 جون کو فلوریڈا سے اسٹارلائنر کے ذریعہ زمین سے روانہ ہوئے تھے اور اگلے دن آئی ایس ایس (بین الاقوامی خلائی اسٹیشن) پر انھیں ڈاک کیا گیا۔ وہاں انھیں تقریباً آٹھ دن ہی گزارنے تھے، لیکن اسٹارلائنر میں آئی خامی نے ان کے مشن کو غیر معینہ مدت کے لیے بڑھا دیا ہے۔ ان کے خلائی اسٹیشن تک پہنچنے کے دوران اسٹارلائنر کے 28 تھرسٹرس میں سے 5 خراب ہو گئے اور کئی دیگر خرابیاں آ گئی ہیں جن کو ٹھیک کرنے کی کوششیں جاری ہیں۔