پاکستان: عمران خان کے گھر کو 20 گھنٹے سے گھیرے بیٹھی پولیس کو ہائی کورٹ نے دیا جھٹکا، گرفتاری پر لگی روک

پاکستان کے سابق وزیر اعظم عمران خان کی گرفتاری کے لیے لاہور واقع ان کی رہائش پر پہنچی پولیس کو لاہور ہائی کورٹ نے آج اس وقت شدید جھٹکا دیا جب عمران خان کی گرفتاری پر 18 گھنٹوں کی روک لگانے کا فیصلہ سنایا۔ ہائی کورٹ نے عمران خان کی گرفتاری کے لیے زماں پارک میں پولیس مہم کو روکنے کا حکم بھی صادر کر دیا ہے۔

موصولہ اطلاعات کے مطابق لاہور ہائی کورٹ کی طرف سے کہا گیا ہے کہ اسلام آباد ہائی کورٹ سے حکم جاری ہونے تک پولیس عمران خان کی گرفتاری کے لیے زماں پارک میں اپنی مہم روک دے۔ حالانکہ یہ حکم جمعرات یعنی 16 مارچ کی صبح 10 بجے تک ہی اثرانداز ہوگا۔ پھر بھی آئندہ حکم تک لاء انفورسمنٹ ایجنسیوں کی طرف سے علاقے کی گھیرابندی جاری رہے گی۔

واضح رہے کہ پاکستان تحریک انصاف (پی ٹی آئی) کے سربراہ عمران خان کو گرفتار کرنے کی پولیس اور رینجرس کی ہر کوشش ناکام رہی۔ ’جیو نیوز‘ کے مطابق پولیس اور رینجرس کی ٹیم بدھ کی شام عمران خان کے گھر زماں پارک سے لوٹ گئی۔ وہاں سے کئی ویڈیوز سوشل میڈیا پر پوسٹ کیے گئے ہیں جن میں عمران کے حامی خوشیاں مناتے دیکھے جا سکتے ہیں۔

دلچسپ بات یہ ہے کہ خالی ہاتھ لوٹنے والی پولیس نے کرکٹ کو اپنی ناکامی کے پیچھے کی وجہ بتائی ہے۔ پولیس کی طرف سے کہا گیا ہے کہ لاہور میں 19 مارچ تک کرکٹ میچ ہوگا، ایسے میں وہ یہ نہیں چاہتے کہ شہر میں دقت پیش آئے۔ لاہور پولیس کے ایک افسر نے کہا کہ ’’ہم نے عمران خان کی گرفتاری ٹالنے کا فیصلہ کیا ہے اور اس کی وجہ یہ ہے کہ لاہور میں 15 سے 19 مارچ تک پاکستان سپر لیگ سیزن 8 کے میچ قذافی اسٹیڈیم میں کھیلے جانے ہیں۔‘‘ ایک پولیس افسر نے مانا کہ لاہور میں افرا تفری اور تشدد کا ماحول بنا رہا تو پاکستانی اور بیرون ملکی کھلاڑیوں و ناظرین کو دقت پیش آ سکتی ہے۔ لہٰذا فی الحال پولیس واپس لوٹ گئی ہے۔ بتایا جا رہا ہے کہ جب 19 مارچ کو فائنل میچ ہوگا اس کے بعد ہی پولیس دوبارہ عمران کے گھر دستک دے پائے گی۔