عمران خان کی گرفتاری کے بعد پی ٹی آئی کے ایک اور رہنما کے خلاف کارروائی، سابق گورنر پنجاب گرفتار

اسلام آباد: پاکستان کے سابق وزیر اعظم عمران خان کو منگل کو القادر ٹرسٹ سے متعلق ایک کیس میں گرفتار کیا گیا تھا، جس کے بعد ملک بھر میں پرتشدد مظاہرے ہوئے۔ ان کی گرفتاری کو 24 گھنٹے بھی نہیں گزرے کہ پی ٹی آئی کے ایک اور رہنما اور صوبہ پنجاب کے سابق گورنر عمر سرفراز چیمہ کو گرفتار کر لیا گیا۔ بدھ یعنی آج عمر سرفراز کو اینٹی کرپشن اسٹیبلشمنٹ (اے سی ای) نے ان کے گھر پر چھاپے کے دوران حراست میں لیا۔

سابق گورنر پنجاب عمر سرفراز چیمہ کی گرفتاری کی ویڈیو بھی منظر عام پر آ گئی ہے، جس میں دیکھا جاسکتا ہے کہ ایڈیشنل ڈائریکٹر اینٹی کرپشن ٹیم کے ہمراہ عمر سرفراز چیمہ کو گھر سے گرفتار کر رہے ہیں۔ ویڈیو میں دیکھا جا سکتا ہے کہ اینٹی کرپشن کی جانب سے گرفتاری فجر کے وقت ساڑھے 4 بجے کی گئی۔ عمر سرفراز کے اہل خانہ ٹیم سے سوال کرتے ہیں کہ انہیں کہاں لے کر جا رہے ہیں؟ جس پر ٹیم انہیں خاموش رہنے کو کہتی ہے۔

ویڈیو میں عمر سرفراز چیمہ اینٹی کرپشن ٹیم کے ساتھ جانے سے پہلے کہتے ہیں کہ ‘انہیں جوتے پہننے دیئے جائیں’، جس کے بعد وہ خود ٹیم کے ہمراہ چلے جاتے ہیں۔ خیال رہے کہ سابق وزیر اعظم کو منگل کے روز اسلام آباد ہائی کورٹ سے رینجرز پیرا ملٹری فورس کے ایک ڈرامائی اقدام میں گرفتار کیا گیا تھا۔ ان کی گرفتاری کے بعد پاکستان میں ہنگامہ برپا ہو گیا اور کئی شہروں میں احتجاجی مظاہرے شروع ہو گئے۔