مشرقی اسپین میں ہیلی کاپٹر حادثے میں تین افراد ہلاک

مشرقی اسپین کے ایک شہر کے قریب اتوار کو ہیلی کاپٹر بجلی کی تاروں پر گرنے سے تین افراد ہلاک ہو گئے۔ حادثہ مقامی وقت کے مطابق صبح 10 بجے کے قریب پوکول قصبے کے قریب ایک پہاڑی علاقے میں اس وقت پیش آیا جب تینوں وہاں بجلی کی لائنوں کا معائنہ کر رہے تھے۔ اطلاعات کے مطابق، ابھی تک نامعلوم وجوہات کی بنا پر، ہیلی کاپٹر ایک ہائی وولٹیج لائن سے ٹکرا گیا اور قریبی کھیت میں گر کر تباہ ہو گیا، جس میں سوار تمام افراد ہلاک ہو گئے۔

علاقے میں محکمہ  ہنگامی خدمات نے کہا ہے کہ انہیں ’’ایک ہیلی کاپٹر کے گرنے کی اطلاعات موصول ہوئی ہیں جو پوکول میں بجلی کی لائنوں کا معائنہ کر رہا تھا۔‘‘ انہوں نے کہا کہ انہوں نے ایک خصوصی پہاڑی بچاؤ گروپ کے ارکان، ایک ایمبولینس اور تین فائر گاڑیوں کے ساتھ ایک ہیلی کاپٹر جائے وقوعہ پر روانہ کیا ہے۔

طبی خدمات نے جائے حادثہ پر ہیلی کاپٹر کے اندر تین افراد کی موت کی تصدیق کی ہے۔مقامی میڈیا کا کہنا ہے کہ حادثے کا مقام ابھی بھی خطرناک ہے کیونکہ حادثے کے بعد ہیلی کاپٹر کے اوپر لائیو تاریں لٹک گئی ہیں جبکہ حادثے کے بعد علاقے میں ایندھن پھیل گیا ہے۔