باتیں ترقی کی اور نعرے رام-رام اور پاکستان کے، بی جے پی کے وزیر نے عوام کو ورغلانے کا پرانا ہتھکنڈہ اپنایا

اتر پردیش اسمبلی کے ضمنی انتخاب کے لیے ابھی تاریخ کا اعلان نہیں ہوا ہے لیکن ابھی سے ہی اشتعال انگیز بیانات کا سلسلہ شروع ہو گیا ہے اور پڑوسی ملک پاکستان کا بھی راگ الاپا جانے لگا ہے۔ مویشی پروری کے وزیر دھرمپال سنگھ نے مراد آباد کے کندرکی اسمبلی حلقہ میں کسان سمیلن سے خطاب کرتے ہوئے کہا کہ رام - رام اتنے زور سے بولو کہ پاکستان کا سینہ دہل جائے۔

وزیر دھرم پال سنگھ نے اپنی تقریر میں کہا کہ یہ انتخاب کوئی ہندو مسلم یا ذات برادری کا نہیں ہے، یہ ترقی کا انتخاب ہے۔ عوام اس بار بی جے پی کو بڑی فتح سے ہمکنار کرکے تاریخ رقم کریں گے۔ ہماری تہذیب ہے اور اصول ہے کہ کسان جب جاتا ہے تو رام – رام بولتا ہے۔ یہ رام اتنی زور سے بولو کہ پاکستان کا سینہ دہل جائے۔ دنیا میں کوئی ایسا ملک نہیں ہے جو 5000 روپے پنشن مہینہ کا دیتا ہو، صرف ہندوستان ہی ایسا ملک ہے جہاں وزیراعظم کی 'سمّان ندھی' کے نام سے پنشن ملنے کا کام ہوتا ہے۔

ذرائع ابلاغ کے سوالوں کا جواب دیتے ہوئے وزیر دھرمپال نے مزید کہا "میں نے ابھی اپنی تقریر میں کہا تھا کہ دو انتظامات ہیں، 'ایک کرشی اور ایک رشی'، کھیتی کسان پیدا کرتا ہے جس سے ہماری زندگی چلتی ہے اور رِشی تخلیق طے کرتا ہے۔ تخلیق کی بنیاد پر، طور طریقہ اور خیال کی بنیاد پر ہماری زندگی کی پیش رفت ہوتی ہے۔ سنتوں پر تبصرہ کرنا ناقابل معافی ہے"۔

انہوں نے کہا کہ ملک میں 'سب کا ساتھ اور سب کی ترقی' کا جو نعرہ وزیراعظم نے دیا ہے، آج دنیا کے ملکوں میں نریندر مودی نے ہندوستان کا سر فخر سے بلند کرنے کا کام کیا ہے۔ دھرمپال سنگھ نے دعویٰ کیا کہ بی جے پی یہاں ریکارڈ ووٹوں سے جیتے گی اور کندرکی اسمبلی کی ترقی نہیں بلکہ چہار طرفہ ترقی ہوگی۔ وزیر نے حالانکہ اپنے خطاب میں ترقی کی بات کی لیکن ساتھ ہی انہوں نے اس میں پاکستان کو بھی شامل کرکے ووٹ حاصل کرنے کے پارٹی کے پرانے ہتھکنڈے کی روایت کو برقرار رکھا۔