وکرما سنگھے کے گھر پر حملہ کرنے کے الزام میں تین گرفتار

کولمبو: سری لنکا کے دارالحکومت کولمبو میں پولیس نے وزیر اعظم رانیل وکرما سنگھے کے نجی گھر میں آتشزدگی کے معاملے میں تین لوگوں کو گرفتار کیا ہے۔ کولوپٹیا پولیس نے کہا کہ دیگر مشتبہ افراد کی گرفتاری کے لیے تحقیقات جاری ہیں۔ ڈیلی مرر کی رپورٹ کے مطابق گرفتار افراد ماؤنٹ لاوینیا کے رہائشی ہیں اور ان کی عمریں 19، 24 اور 28 سال ہیں۔

بدامنی کے درمیان ہفتہ کو کولمبو میں 5ویں لین پر واقع وکرما سنگھے کی رہائش گاہ کو مظاہرین کے ایک گروپ نے نذر آتش کر دیا تھا۔ سری لنکا میں معاشی بحران کی وجہ سے حالات بد سے بدتر ہوتے جا رہے ہیں۔ یہاں کل ایک بار پھر مظاہرین سڑکوں پر نکل آئے، انہوں نے صبح پریسڈنٹ ہاوس کا محاصرہ کرنے کے بعد اس پر قبضہ کر لیا۔ تاہم صدر گوٹابایا راجا پاکسے موجودہ صورتحال کو دیکھتے ہوئے ایک دن پہلے ہی گھر سے فرار ہوگئے تھے۔

اس کے بعد مظاہرین نے دیر شام وزیر اعظم رانیل وکرما سنگھے کے گھر کو بھی نشانہ بنایا۔ جب مظاہرین وزیر اعظم کی رہائش گاہ کے باہر جمع ہونے لگے تو سیکورٹی فورسز نے انہیں روکنے کے لیے طاقت کا استعمال کیا۔ جس کے بعد مظاہرین مشتعل ہوگئے اور انہوں نے وزیراعظم ہاؤس کو آگ کے حوالے کر دیا۔