روہنی جیل کے 82 اہلکار کے خلاف ایف آئی آر، سکیش سے پیسہ لینے کا الزام

مہاٹھاگ سکیش چندر شیکھر کے معاملے میں ایک بار پھر بڑی خبرسامنے آئی ہے۔ دہلی پولیس کے اقتصادی جرائم ونگ نے روہنی جیل کے 82 افسران اور ملازمین کے خلاف ایف آئی آر درج کی ہے۔ نیوز پورٹل آج تک کے مطابق جیل کے عملے پر الزام ہے کہ یہ لوگ سکیش چندر شیکھر سے تقریباً 1.5 کروڑ روپے ماہانہ رشوت لیتے تھے۔ الزام ہے کہ سکیش جیل میں موبائل فون کے استعمال سمیت علیحدہ بیرک اور دیگر سہولیات فراہم کرنے کے نام پر افسران کو یہ رقم دیتا تھا۔ اس معاملے میں ایف آئی آر 15 جون کو درج کی گئی تھی۔

اس سے پہلے سکیش چندر شیکھر دہلی کی تہاڑ جیل میں رہ کر 200 کروڑ کی دھوکہ دہی کے واقعات کو انجام دے چکا ہے ۔ سکیش نے وزارت داخلہ کا افسر بن کر جیل سے دھوکہ دیا تھا۔ اس نے آواز بدل کر لوگوں کو اپنے جال میں پھنسایا تھا۔ الزام ہے کہ سکیش نے جیل حکام کو لاکھوں کی رشوت دے کر موبائل فون کا استعمال کیا تھا۔ تحقیقات کے بعد جیل کے کئی اہلکارکو گرفتار کر لیا گیا۔

حال ہی میں، سکیش چندر شیکھر جیل کے سیکورٹی نظام کی خلاف ورزی کرتے ہوئے پکڑ ا گیا تھا۔ سکیش جیل کے باہر پیغام بھیجتے ہوئے سی سی ٹی وی کیمرے میں پکڑا گیا ۔ ملزم تہاڑ جیل کے نرسنگ اسٹاف کو خط لکھ کر باہر بھیج رہا تھا۔ جیل انتظامیہ کا کہنا ہے کہ سکیش اپنا پیغام یہاں سے وہاں پہنچاتا تھا۔ اس معاملے میں تہاڑ جیل انتظامیہ نے ملزم نرسنگ اسٹاف کے خلاف کارروائی کے لیے دہلی پولیس کو خط لکھا ہے۔