خاتون جج نے فیصلہ سناتے ہوئے کہا ’اسے جیل بھیجو‘، بھری عدالت میں ملزم نے جج پر ہی کر دیا حملہ، دیکھیں ویڈیو

امریکہ میں حیران کرنے والا ایک واقعہ پیش آیا ہے جہاں جیل بھیجنے کی سزا سنانے والی خاتون جج پر ایک ملزم نے عدالتی روم میں ہی حملہ کر دیا۔ اس واقعہ کی جو ویڈیو سامنے آئی ہے اس میں ملزم دوڑتے ہوئے ٹیبل کے اوپر سے جج پر کودتا ہوا دکھائی دے رہا ہے۔ اس نے خاتون جج کو سبھی کے سامنے پیٹنا شروع کر دیا اور جج کو بچانے کی کوشش میں اس کے قریب بیٹھا سیکورٹی اہلکار بھی زخمی ہو گیا۔

یہ واقعہ امریکہ کے نوادا واقع عدالت میں پیش آیا جس کی ویڈیو انٹرنیٹ پر وائرل ہو رہی ہے۔ میڈیا رپورٹس کے مطابق 30 سال کے دیوبرا ریڈین پر تین بار بیٹری چوری کرنے کا الزام تھا۔ گزشتہ بدھ (3 جنوری) کو کلارک کاؤنٹی ڈسٹرکٹ کورٹ میں جج میری کے ہولتھس کے سامنے اس کی پیشی ہوئی۔ وکیلوں کی دلیلیں سننے کے بعد جج نے دیوبرا کو قصوروار مانتے ہوئے اسے جیل بھیجنے کا حکم سنایا۔ اس بات پر ملزم اتنا ناراض ہوا کہ ٹیبل کے اوپر سے چھلانگ لگاتے ہوئے وہ سیدھے جج صاحبہ کے پاس پہنچا اور ان پر گھونسوں کی بارش شروع کر دی۔

عدالتی کمرے کے اندر یہ سب کچھ اتنی جلدی ہوا کہ وہاں موجود سیکورٹی اہلکاروں کو کچھ بھی سمجھ نہیں آیا۔ کسی کے پاس بھی جج کو بچانے کا موقع نہیں تھا۔ کسی طرح ملزم پر قابو پایا گیا اور پھر اسے جیل لے جایا گیا۔ پورا واقعہ عدالتی کمرے میں لگے کیمرے میں قید ہو گیا جس کا فوٹیج سوشل میڈیا پر وائرل ہو رہا ہے۔

میڈیا رپورٹس کے مطابق ملزم کے حملے میں خاتون جج کو سنگین چوٹیں پہنچی ہیں۔ انھیں بچانے والے مارشل کا کندھا ٹوٹنے کی خبر بھی سامنے آ رہی ہے۔ بتایا جا رہا ہے کہ ملزم خاتون جج کے فیصلے سے اس قدر ناراض ہو گیا تھا کہ سیکورٹی اہلکاروں کی گرفت میں آنے کے بعد بھی اس نے جج کو پیٹنا جاری رکھا۔