ایران میں نئے صدر کا انتخاب 28 جون کو، رئیسی ہیلی کاپٹر حادثے کی تحقیقات شروع
ایران میں صدارتی انتخابات کی تاریخ کا اعلان کردیا گیا ہے اس سے قبل ایرانی مسلح افواج کے چیف آف اسٹاف نے ہیلی کاپٹر حادثے کی تحقیقات کے لیے اعلیٰ افسران کی ٹیم تشکیل دے دی ۔
![<div class="paragraphs"><p>فائل تصویر آئی اے این ایس</p></div>](https://media.assettype.com/qaumiawaz%2F2024-05%2F9b8d02ff-d424-4b87-96d8-c62a65682c06%2FEbrahim_Raisi_f.jpeg?rect=0%2C0%2C835%2C470&auto=format%2Ccompress&fmt=webp)
فائل تصویر آئی اے این ایس
ایرانی صدر ابراہیم رئیسی کے انتقال کے بعد ایران میں نئے صدر کے انتخاب کی تاریخ کا اعلان کر دیا گیا ہے۔ نئے صدر کا انتخاب 28 جون کو کیا جائے گا۔ ایرانی حکومت نے صدارتی ہیلی کاپٹر حادثے کی تحقیقات کے لیے اعلیٰ حکام کی ایک ٹیم بھی تشکیل دی ہے۔
خبر رساں ایجنسی آئی آر این اےنے اطلاع دی ہے کہ اب ایران میں نئے صدر کا انتخاب 28 جون کو ہوگا۔ امیدوار 30 مئی سے 3 جون تک کاغذات نامزدگی داخل کر سکیں گے اور 12 سے 27 جون تک انتخابی مہم چلائی جا سکے گی۔ ایران کے آئین کے آرٹیکل 131 کے تحت نئے صدر کا انتخاب 50 دن کے اندر کرانے کا حکم ہے۔ دریں اثناء سپریم لیڈر آیت اللہ خامنہ ای نے نائب صدر محمد مخبر کو ایگزیکٹو کا سربراہ مقرر کر دیا ہے۔
مسلح افواج کے چیف آف اسٹاف میجر جنرل محمد باقری نے صدر رئیسی کے ہیلی کاپٹر حادثے کی تحقیقات ایک اعلیٰ سطحی وفد کے سپرد کر دی ہے۔ بریگیڈیئر علی عبداللہی کی قیادت میں ایک وفد جائے حادثہ پر بھیجا گیا ہے اور تحقیقات شروع کردی گئی ہیں۔ ایرانی خبر رساں ایجنسی کے مطابق تحقیقات کے نتائج کا اعلان مشن مکمل ہونے کے بعد کیا جائے گا۔
ہردل عزیز، باصلاحیت اور محنتی صدر اور عالم مجاہد سید ابراہیم رئیسی اور ان کے ساتھیوں کی شہادت کے بعد، مسلح افواج کے چیف آف اسٹاف بریگيڈیئر جنرل محمد باقری نے پیر کی صبح کو جنرل علی عبداللہی کو حکم دیا کہ شہری اور فوجی ہوابازی کے فنی ماہرین کے تعاون سے اس افسوسناک حادثے کی جامع تحقیقات انجام دیں۔رپورٹ کے مطابق، اس ٹیم نے جائے حادثہ پر فوری طور پر پہنچ کر انویسٹیگیشن کا سلسلہ شروع کردیا ہے جس کی تفصیلات کے بارے میں اطلاع دی جائے گی۔
یاد رہے کہ صدر سید ابراہیم رئیسی ایران اور آذربائیجان کے مابین ڈیم کے ایک منصوبے کا افتتاح کرکے تبریز شہر لوٹ رہے تھے جہاں ان کا ہیلی کاپٹر حادثے سے دوچار ہوگیا۔ اس واقعے میں صدر مملکت، وزیر خارجہ، تبریز شہر کے امام جمعہ، صوبہ مشرقی آذربائیجان کے گورنر اور صدر رئیسی کے محافظوں کے ہیڈ اور پائلٹس کی ٹیم جاں بحق ہوگئی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔