طالبان نے بغیر سفری دستاویز والوں سے کابل ائیرپورٹ چھوڑنے کو کہا، دہشت کا عالم!

افغانستان میں اس وقت حالات انتہائی کشیدہ ہیں اور وقتاً فوقتاً تصادم اور گولیاں چلنے کی خبریں موصول ہو رہی ہیں۔ اس درمیان طالبان کے ایک رکن نے جمعرات کو کابل ہوائی اڈے کے باہر موجود بھیڑ سے کہا کہ صرف سفری دستاویز والے لوگوں کو ہی کابل ائیر پورٹ میں داخلے کی اجازت ہوگی۔ محمد جمیل نامی ایک شخص نے خبر رساں ادارہ سنہوا کو بتایا کہ ’’ہوائی اڈے کی سیکورٹی کا انچارج ہونے کا دعویٰ کرنے والے ایک شخص نے ہمیں بتایا کہ جن لوگوں کے پاس قانونی دستاویز نہیں ہیں، انھیں جلد سے جلد گیٹ سے باہر جانا ہوگا۔‘‘

بدھ کی صبح سے ائیرپورٹ میں داخلے کا انتظار کر رہے جمیل کا کہنا ہے کہ اس کے پاس کوئی پاسپورٹ نہیں ہے۔ انھوں نے بتایا کہ وہ صرف افغانی شناختی کارڈ رکھتے ہیں۔ جمیل کا کہنا ہے کہ وہ یہ سن کر ہوائی اڈے پر پہنچے تھے کہ غیر ملکی طیارے لوگوں کو ائیرلفٹ کر رہے ہیں اور جو کابل چھوڑنا چاہتے ہیں انھیں لے جا رہے ہیں۔

قابل ذکر ہے کہ طالبان نے پیر کے روز ہی ہوائی اڈے پر کنٹرول کر لیا اور سفری دستاویز رکھنے والے لوگوں کے لیے محفوظ راستہ فراہم کرنے پر متفق ہوئے۔ امریکی فوج نے اتوار کی صبح ان کے لیے کام کرنے والے سفیروں اور افغانوں کو نکالنا شروع کر دیا۔ ذرائع کے مطابق لوگوں کو افغانستان سے نکالنے کے لیے پرواز جمعرات کی صبح شروع ہوئیں اور اگست کے آخر تک جاری رہیں گی۔