نیویارک: سکھوں پر مبینہ حملوں کے خلاف پولیس نے دو افراد کو کیا گرفتار

نیویارک پولیس نے شہر میں سکھوں پر دو الگ الگ حملوں کے سلسلے میں دو لوگوں کو گرفتار کیا ہے۔ پولیس محکمہ نے کہا کہ ایک 19 سالہ شخص ورنون ڈگلس کو جمعرات کو ایک 70 سالہ شخص پر 3 اپریل کو مبینہ طور سے حملہ کرنے کے الزام میں گرفتار کیا گیا تھا۔ ’سکھ گٹھ بندھن‘ نے متاثرہ کی شناخت ایک ہندوستانی باشندہ نرمل سنگھ کی شکل میں کی۔

حملے کی جانچ نیویارک پولیس کے ہیٹ کرائم ٹاسک فورس نے کی تھی اور ڈگلس پر مبینہ طور سے ہیٹ کرائم کرنے کا الزام عائد کیا گیا ہے۔ پولیس نے منگل کو اسی رچمنڈ ہِل علاقے میں دو سکھ افراد پر حملے کے فوراً بعد 20 سالہ ہجکیاہ کولمین کو گرفتار کیا تھا۔ کولمین اور ایک دیگر شخص نے دونوں اشخاص کی پگڑی اتاری، حملہ کیا اور انھیں لوٹ لیا۔

دوسرا حملہ ایک احتجاجی مظاہرہ کے دو دن بعد ہوا۔ نیویارک کے کئی لیڈروں نے سکھوں پر مبینہ حملوں کی مذمت کی۔ امریکی لیڈر چک شومر نے کہا کہ ’’جب کسی شخص کو اس کے پس منظر کے سبب پیٹا جاتا ہے اور چوٹ پہنچائی جاتی ہے کہ وہ کون ہے، اس کا مذہب، اس کی قومیت اور ذات کیا ہے، یہ امریکہ کے لیے ایک سیاہ دن ہے۔‘‘ انھوں نے مزید کہا کہ ’’ہماری تاریخ کا سبق یہ ہے کہ ہمیں اس سے لڑنا چاہیے اور اس کے خلاف بولنا چاہیے۔‘‘

سکھ گٹھ بندھن کے افسر نکی سنگھ نے دوسرے حملے کے بعد کہا کہ ’’سکھ پر حملے نئے نہیں ہیں، لیکن حال ہی میں ایک ہی جگہ پر بار بار ہونے والے حملے خصوصی طور پر مایوس کن اور قابل مذمت ہیں۔‘‘ واضح رہے کہ بدھ کے روز گورنر کیتھی ہوچل نے سکھ گٹھ بندھن کے ساتھ نفرت مخالف کرائم ریلی میں حصہ لیا۔