زلزلہ کی تباہی سے اب تک باہر نہیں نکلا جاپان، مہلوکین کی تعداد بڑھ کر 213 پہنچی، 52 افراد لاپتہ

نئے سال کے پہلے ہی دن یعنی یکم جنوری کو جاپان کے اشیکاوا علاقہ میں جو خوفناک زلزلہ آیا تھا، اس سے اب تک ملک باہر نہیں نکل سکا ہے۔ زلزلہ کے بعد کئی علاقوں میں موسلادھار بارش ہوئی ہے جس سے اب لینڈ سلائڈنگ کا خطرہ بڑھ گیا ہے اور راحت رسانی کے کاموں میں بھی کئی طرح کی مشکلات کا سامنا کرنا پڑ رہا ہے۔ تازہ ترین خبروں کے مطابق 7.6 شدت کے تباہناک زلزلہ کے سبب ہلاک ہونے والوں کی مجموعی تعداد جمعرات کو بڑھ کر 213 پہنچ گئی ہے۔ افسران کا کہنا ہے کہ اب بھی 52 افراد لاپتہ ہیں جن کی تلاش جاری ہے۔

خبر رساں ایجنسی شنہوا نے جاپانی میڈیا چینل ’این ایچ کے‘ کے حوالے سے بتایا کہ جمعرات کی صبح تک زخمی افراد کی تعداد 567 تھی۔ مہلوکین کے تعلق سے تفصیلات پیش کرتے ہوئے کہا گیا ہے کہ سوزو میں 98، وازیما میں 83، انامیزو میں 20، ناناؤ میں 5، نوٹو میں 4، شیکا میں 2 اور ہاکوئی میں 1 ہلاکت کی تصدیق ہوئی ہے۔ پریفکچورل حکومت نے بھی ڈیزاسٹر (آفت) کے سبب 8 مزید اموات کی تصدیق کی ہے۔ اس کا مطلب یہ ہے کہ متاثرین زلزلہ سے تو بچ گئے لیکن اس کے بعد جسمانی و ذہنی تناؤ کے سبب بگڑتی چوٹوں یا بیماریوں کی وجہ سے انتقال کر گئے۔

میڈیا رپورٹس کے مطابق اب متاثرہ علاقوں میں عمارتوں کے منہدم ہونے کے خدشات کا جائزہ لینے پر زیادہ توجہ دی جا رہی ہے۔ علاقہ میں منگل سے لگاتار بارش ہو رہی ہے جس سے لینڈ سلائڈنگ جیسے خطرے کا اندیشہ بڑھ گیا ہے۔ پریفیکچورل افسران کے مطابق کووڈ-19 اور انفلوئنزا جیسی متعدی بیماریوں کے سبب خطرات کے درمیان 26 ہزار سے زیادہ لوگ ایگزٹ سنٹرس میں پناہ لے رہے ہیں۔ اس درمیان 3100 افراد سڑک میں ٹوٹ پھوٹ کے سبب الگ تھلگ پڑے ہوئے ہیں۔