دہلی-این سی آر میں زلزلہ، دیر تک محسوس کئے گئے جھٹکے، افغانستان میں تھا مرکز

نئی دہلی: دہلی-این سی آر، پنجاب سمیت چنڈی گڑھ اور جموں و کشمیر میں جمعرات کے روز زلزلے سے زمین ایک بار پھر لرز اٹھی۔ زلزلے کے یہ جھٹکے کافی دیر تک محسوس کیے گئے۔ زلزلہ آتے ہی لوگ گھروں اور دفاتر سے باہر نکل آئے۔ تاحال کسی جانی یا مالی نقصان کی کوئی خبر نہیں ہے۔ زلزلے کا مرکز فیض آباد، افغانستان تھا اور ہندوکش کے علاقے میں ریکٹر اسکیل پر اس کی شدت 6.2 تھی۔

جموں و کشمیر کے پونچھ ضلع کے پیر پنچال علاقے کے جنوب میں بھی زلزلے کے جھٹکے محسوس کیے گئے۔ زلزلے کے یہ جھٹکے نہ صرف ہندوستان بلکہ پڑوسی ملک پاکستان میں بھی محسوس کیے گئے۔ یہاں سے بھی کچھ ایسی ہی تصاویر سامنے آئی ہیں، جن میں لوگ اپنے گھروں اور دفاتر سے باہر بھاگتے ہوئے نظر آ رہے ہیں۔

ماہرین پہلے ہی دہلی-این سی آر میں زلزلے کے حوالے سے وارننگ جاری کر چکے ہیں۔ جو کہتے ہیں کہ دہلی-این سی آر میں کسی بھی وقت بڑا زلزلہ آ سکتا ہے۔ تاہم یہ کب آئے گا اس کی تصدیق نہیں کی جا سکی ہے۔ دہلی-این سی آر کے نیچے 100 سے زیادہ لمبی اور گہری فالٹز ہیں۔ ان میں سے کچھ دہلی-ہریدوار رج، دہلی-سرگودھا رج اور عظیم باؤنڈری فالٹ پر ہیں۔ اس کے علاوہ دیگر فعال فالٹز بھی ان سے وابستہ ہیں۔