ایران کے سپریم لیڈر نے ہزاروں قیدیوں کو معاف کیا، رہا ہونے والوں میں مظاہرین بھی شامل

ایران کے سپریم لیڈر نے حالیہ حکومت مخالف مظاہروں میں گرفتار کیے گئے "دسیوں ہزار" قیدیوں کے لیے قید کی سزاؤں کو معاف یا کم کرنے کی اجازت دے دی ہے۔ الجزیرہ میں شائع خبر کے مطابق اتوار کے روز آیت اللہ علی خامنہ ای کی طرف سے منظور کردہ معافی شرائط کے ساتھ سامنے آئی۔ سرکاری میڈیا رپورٹس میں اعلان کردہ تفصیلات کے مطابق اس اقدام کا اطلاق ایران میں قید متعدد دوہری شہریت  والے لوگوں پر نہیں ہوگا۔

سرکاری خبر رساں ایجنسی ’ارنا‘ نے رپورٹ کیا کہ جن لوگوں پر "زمین پر بدعنوانی" کا الزام ہے ان کو اس میں کوئی چھوت نہیں ملے گی ۔ واضح رہے اس الزام میں ملوث کچھ مظاہرین میں سے چار کو پھانسی دے دی گئی ہے۔ نہ ہی اس کا اطلاق ان لوگوں پر ہوگا جن پر "غیر ملکی ایجنسیوں کے لیے جاسوسی" کا الزام ہے اور نہ ہی "اسلامی جمہوریہ کے مخالف گروہوں سے وابستہ ہو"۔

گزشتہ ستمبر میں ملک کی مورالٹی (اخلاقیات) پولیس کی حراست میں ایک نوجوان ایرانی کرد خاتون مہسا امینی کی ہلاکت کے بعد ایران میں مظاہرے پھیل گئے۔ 22 سالہ نوجوان کو اسلامی لباس کے ضابطوں کی خلاف ورزی پر گرفتار کیا گیا تھا۔ واضح رہے زندگی کے تمام شعبوں سے تعلق رکھنے والے ایرانیوں نے مظاہروں میں حصہ لیا، جو کہ 1979 کے انقلاب کے بعد سے ایران کی حکومت کے لیے سب سے بڑے چیلنجوں میں سے ایک ہے۔ انسانی حقوق کے کارکنوں کی نیوز ایجنسی کے مطابق، مظاہروں کے سلسلے میں تقریباً 20,000 افراد کو گرفتار کیا گیا ہے، جن پر حکام نے ایران کے "غیر ملکی دشمنوں" پر اشتعال انگیزی کا الزام لگایا ہے۔

انسانی حقوق کی تنظیموں کا کہنا ہے کہ کریک ڈاؤن میں 500 سے زائد افراد ہلاک ہو چکے ہیں جن میں 70 نابالغ بھی شامل ہیں۔ ایرانی عدلیہ کے مطابق کم از کم چار افراد کو پھانسی دی گئی ہے۔ ایران نے مہینوں سے ہلاکتوں کی تعداد پیش نہیں کی ہے۔ واضح رہے پھانسی شروع ہونے کے بعد سے مظاہروں میں کافی کمی آئی ہے۔

خامنہ ای کو لکھے گئے خط میں معافی کی درخواست کرتے ہوئے عدلیہ کے سربراہ غلام حسین محسنی ایجی نے کہا کہ "حالیہ واقعات کے دوران، بہت سے لوگوں نے، خاص طور پر نوجوانوں نے، دشمن کے اشتعال انگیزی اور پروپیگنڈے کے نتیجے میں غلط اقدامات اور جرائم کا ارتکاب کیا۔"

غلام حسین محسنی ایجی نے لکھا، "چونکہ غیر ملکی دشمنوں اور انقلاب مخالف دھاروں کے منصوبوں کو ناکام بنا دیا گیا ہے، ان نوجوانوں میں سے بہت سے اب اپنے کیے پر پچھتا رہے ہیں۔"خامنہ ای نے 1979 کے اسلامی انقلاب کی سالگرہ کے اعزاز میں معافی کی منظوری دی۔ خامنہ ای نے 1989 میں ملک کے سیاسی اور مذہبی رہنما کے طور پر عہدہ سنبھالا۔