امریکہ: ماؤئی جنگل کی آگ میں کئی ثقافتی وراثت تباہ، 66 افراد اب بھی لاپتہ

ہوائی کے گورنر جوش گرین نے جانکاری دی ہے کہ ماؤئی جزیرہ پر جنگل میں لگی آگ کے بعد 66 افراد اب بھی لاپتہ ہیں۔ نیوز ایجنسی شنہوا کی رپورٹ کے مطابق جنگل کی آگ 8 اگست کو بھڑکی تھی اور ماؤئی کے لاہنا میں پھیل گئی، جس سے سمندر کے کنارے کا تاریخی شہر جل کر خاک ہو گیا۔

افسران کے مطابق آگ نے 115 لوگوں کی جان لے لی ہے اور کئی سودیشی ثقافتی وراثت کو تباہ کر دیا۔ یہ ہوائی کی تاریخ میں سب سے تباہناک قدرتی آفات اور سب سے خطرناک امریکی جنگل کی آگ میں سے ایک قرار دیا جا رہا ہے۔ گرین نے جمعہ کو ایک خطاب میں کہا کہ ’’آج ایک ماہ ہو گیا ہے۔ زبردست آگ نے لاہنا اور ماؤئی کے دیگر علاقوں کو تباہ کر دیا تھا۔‘‘

ہوائی کے گورنر نے کہا کہ یو ایس فیڈرل بیورو آف انوسٹی گیشن نے بتایا کہ انھیں موصول فون کال اور ای میل کی بنیاد پر 66 لوگ اب بھی لاپتہ ہیں۔ یہ وہ تعداد ہیں جو شروع میں 3000 سے زیادہ تھی اور پھر گزشتہ ہفتہ گھٹ کر 385 ہو گئی۔ گورنر کے مطابق نقل مکانی کرنے والے 7500 سے زیادہ زندہ بچے لوگوں کو پناہ گزیں مقامات سے 29 ہوٹلوں اور سینکڑوں ایئر بی این بی میں منتقل کر دیا گیا ہے۔ انھوں نے یہ بھی بتایا کہ ریاست کے اٹارنی جنرل اینی لوپیز ایک آزاد تھرڈ پارٹی پرائیویٹ آرگنائزیشن کے ذریعہ سے آگ لگنے کے ابساب اور ایمرجنسی رسپانس کی پوری جانچ کر رہے ہیں۔