افغانستان: 35 ایئرپورٹ کے ملازمین نے دیا استعفیٰ، 8 ماہ سے نہیں ملی تھی تنخواہ

افغانستان کے قندھار علاقہ میں احمد شاہ بابا انٹرنیشنل ایئرپورٹ کے کئی ملازمین نے مہینوں سے تنخواہ اور محنتانہ کی ادائیگی نہ ہونے کے سبب استعفیٰ دے دیا ہے۔ خامہ پریس کی رپورٹ کے مطابق گزشتہ سال اگست میں افغانستان پر طالبان کے قبضہ کرنے کے بعد سے اب تک کم از کم 35 ایئرپورٹ کے ملازمین نے استعفیٰ دے دیا ہے۔

استعفیٰ دینے والے ملازمین کا کہنا ہے کہ وہ مالی بحران کے شکار ہیں۔ طالبان حکومت نے انھیں گزشتہ آٹھ ماہ سے تنخواہ نہیں دی ہے۔ ذرائع کے مطابق اگر ایئرپورٹ ملازمین کی تنخواہ کی ادائیگی وقت پر نہیں کی جاتی ہے تو آنے والے دنوں میں استعفے کی تعداد بڑھ سکتی ہے۔

بڑے پیمانے پر ایئرپورٹ ملازمین کے استعفے پر طالبان کے ٹرانسپورٹیشن اور شہری ہوابازی وزارت نے دعویٰ کرتے ہوئے کہا کہ ملازمت چھوڑنے والے ملازمین ہاؤس کیپر، ہیلپرس اور چوکیدار تھے۔ ابھی یہ پتہ نہیں چل پایا ہے کہ ملازمین کو ادائیگی کی گئی یا نہیں۔

واضح رہے کہ انٹرنیشنل فیڈریشن آف ریڈ کراس اینڈ ریڈ کریسنٹ سوسائٹیز (آئی ایف آر سی) نے گزشتہ ہفتے متنبہ کیا تھا کہ افغانستان حال میں زمین پر سب سے خراب انسانی بحران کا سامنا کر رہا ہے، جس میں تقریباً 20 ملین لوگ خوردنی عدم تحفظ کا سامنا کر رہے ہیں۔