6551 ٹن وزنی جہاز ’جِن تیان‘ سمندر میں ڈوب گیا، 6 چینی شہریوں سمیت 8 افراد کی موت

جنوبی کوریا اور جاپان کے درمیان سمندر میں ایک مال بردار جہاز کے ڈوبنے کی خبریں سامنے آ رہی ہیں۔ میڈیا رپورٹس کے مطابق حادثہ بدھ کے روز پیش آیا جس میں ڈرائیونگ عملہ کے 8 اراکین کی موت ہو گئی ہے۔ ان میں سے 6 کا تعلق چین سے بتایا جا رہا ہے۔ جاپانی میڈیا رپورٹس کے مطابق حادثہ جاپان کے ناگاساکی علاقہ سے دور مشرقی چینی سمندر میں ہوا۔

اس سے قبل خبر آئی تھی کہ حادثہ کا شکار ہوئے مال بردار جہاز میں 22 لوگ سوار تھے جن میں سے 14 لوگوں کو باہر نکالا گیا تھا اور ان میں سے 2 افراد کی موت ہو گئی تھی۔ اب مجموعی طور پر 8 افراد کی موت کی خبریں سامنے آئی ہیں۔ رپورٹس کے مطابق 6551 ٹن وزنی مال بردار جہاز ’جِن تیان‘ ہانگ کانگ میں رجسٹرڈ تھا۔ اس جہاز میں 22 لوگ سوار تھے جن میں سے 14 کا تعلق چین سے تھا جب کہ 8 دیگر لوگ میانمار کے بتائے جا رہے ہیں۔ یہ جہاز لکڑی لے کر ملیشیا سے جنوبی کوریا کے انچیون جا رہا تھا۔

کیوڈو نیوز ایجنسی کے مطابق جہاز نے مشرقی چین کے سمندر میں جاپان کے دانجو جزائر سے تقریباً 110 کلومیٹر مغرب میں رات تقریباً 11.15 بجے ایمرجنسی بحران کی اطلاع دی۔ حالانکہ جہاز نے جب مدد کی کال کی تھی اس وقت آندھی کا الرٹ تھا۔ بتایا جا رہا ہے کہ جہاز کے ڈرائیور عملہ کے اراکین کو جنوبی کوریائی ساحلی محافظ اور جاپان کے دو فضائی سیکورتی فورس کے ذریعہ بچایا گیا تھا۔ اے ایس ڈی ایف کے ذریعہ بچائے گئے دو لوگوں کو ناگاساکی ہوائی اڈے کے ذریعہ سے اسپتال بھیجے جانے کے بعد مردہ قرار دے دیا گیا۔