ہندوستان اور بنگلہ دیش کے درمیان کئی معاہدے پر دستخط، بنگلہ دیشی وزیر اعظم شیخ حسینہ کا دورۂ ہند رہا کامیاب
سکریٹری برائے خارجہ ونئے موہن کواترا نے بتایا کہ بنگلہ دیشی وزیر اعظم کا موجودہ دورۂ ہند دونوں ممالک کے درمیان مستقل اعلیٰ سطحی سیاسی روابط کا اہم حصہ ہے۔
نریندر مودی اور شیخ حسینہ تبادلہ خیال کرتے ہوئے، تصویر@narendramodi
بنگلہ دیش کی وزیر اعظم شیخ حسینہ ہندوستان کے دو روزہ دورے پر ہیں۔ وہ 21 جون کو ہندوستان پہنچی تھیں اور آج ان کی ملاقات ہندوستانی وزیر اعظم نریندر مودی سمیت کئی سرکردہ سیاسی لیڈران اور وزارت خارجہ کے اعلیٰ افسران سے ہوئی۔ بنگلہ دیشی وزیر اعظم کے دورے کی جانکاری دیتے ہوئے سکریٹری برائے خارجہ ونئے موہن کواترا نے ایک پریس کانفرنس میں بتایا کہ ’’آج صبح وزیر اعظم شیخ حسینہ کا راشٹرپتی بھون احاطہ میں رسمی استقبال کیا گیا، جس کے بعد ان کی طرف سے مہاتما گاندھی کو خراج عقیدت پیش کرنے کے لیے راج گھاٹ کا دورہ کیا گیا۔ پھر وزیر اعظم مودی اور وزیر اعظم شیخ حسینہ نے حیدر آباد ہاؤس میں مختلف موضوعات پر تبادلہ خیال کیا۔‘‘
ونئے موہن کواترا نے بتایا کہ بنگلہ دیش کی وزیر اعظم کا دورۂ ہند دونوں ممالک کے درمیان مستقل اعلیٰ سطحی سیاسی روابط کا اہم حصہ ہے۔ بنگلہ دیش کی وزیر اعظم اس مہینے کے شروع میں اٹھارہویں لوک سبھا کے انتخاب کے بعد 9 جون کو مرکزی وزارتی کونسل کی حلف برداری تقریب میں شامل ہونے والے بین الاقوامی لیڈران میں سے ایک تھیں۔ شیخ حسینہ نے ہندوستان کا گزشتہ سرکاری دورہ ستمبر 2022 میں کیا تھا، جس کے بعد وہ جی-20 میں حصہ لینے کے لیے ایک مہمان کی شکل میں ہندوستان آئی تھیں۔
بہرحال، بنگلہ دیشی وزیر اعظم شیخ حسینہ کا تازہ دور ہندوستان اور بنگلہ دیش دونوں کے لیے بہت اہم ثابت ہوا کیونکہ دونوں ممالک کے درمیان کئی اہم معاہدوں پر دستخط ہوئے۔ آج پی ایم مودی اور شیخ حسینہ کی ملاقات کے درمیان دو فریقی تعاون پر تبادلہ خیال ہوا۔ اس میں مقامی اور عالمی ایشوز پر بھی بات چیت ہوئی۔ اس دوران دونوں لیڈروں نے ہمارے دو فریقی اور ذیلی علاقائی تعاون کو مضبوط کرنے کے لیے ایک نئی سمت و رفتار دینے پر اتفاق ظاہر کیا۔ دونوں لیڈروں نے دہشت گردی، شدت پسندی اور ہماری طویل ارضی سرحد کے پرامن انتظام و انصرام سے متعلق روابط کو مضبوط کرنے پر بھی اتفاق ظاہر کیا۔
سکریٹری برائے خارجہ موہن کواترا نے کچھ اہم جانکاریاں دیتے ہوئے بتایا کہ بنگلہ دیش کے اندر ہندوستان تیستا ندی کے تحفظ اور مینجمنٹ کا کام کرے گا جس کے لیے ہندوستان کی طرف سے مناسب امداد کی جائے گی۔ دونوں ممالک نے خلائی ٹیکنالوجی پر بھی ساتھ مل کر کام کرنے کا عہد کیا ہے جس کا مقصد ہندوستان کے لانچ وہیکل پر بنگلہ دیش کے لیے مشترکہ طور سے تیار چھوٹے سیٹلائٹ کی لانچنگ کے لیے تعاون قائم کرنا ہے۔ دونوں لیڈروں (پی ایم مودی اور شیخ حسینہ) کے درمیان دفاعی تعاون پر بھی بات چیت ہوئی۔
موہن کواترا کا کہنا ہے کہ رابطہ ہندوستان اور بنگلہ دیش کی شراکت داری کے مرکزی ستونوں میں سے ایک ہے۔ ہم راج شاہی اور کولکاتا کے درمیان ایک نئی مسافر ٹرین سروس شروع کر رہے ہیں۔ علاوہ ازیں ہم مزید ایک بس سروس بھی شروع کریں گے جو کولکاتا اور چٹگاؤں کے درمیان چلے گی۔
اس سے قبل وزیر اعظم نریندر مودی نے اپنے خطاب میں کہا کہ ہم جلد ہی بنگلہ دیش سے ہندوستان کے لیے میڈیکل ویزا کو ای-میڈیکل ویزا زمرہ میں ڈال دیں گے، جو بہت بڑی سہولت فراہم کرے گی اور ان لوگوں کے لیے بھی ایک بڑی سہولت ہوگی جو اس ای-میڈیکل ویزا منصوبہ کا فائدہ اٹھائیں گے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔