دنیا کی لاکھوں جھیلیں بیماری میں مبتلا، ہندوستان کی 3043 جھیلوں پر بھی منڈلا رہا خطرہ!

دنیا میں 14 لاکھ سے زائد 10 ہیکٹیئر یا اس سے بڑی جھیلیں ہیں جن میں سے تقریباً 5.9 فیصد جھیلیں ایسی ہیں جو طحالب (algae) کے بڑھنے سے مشکل حالات کا سامنا کر رہی ہیں۔ ان میں سے 3043 جھیلیں تو ہندوستان میں ہی ہیں۔ یہ جھیلیں انسانوں کی طرح صحت سے متعلق کئی طرح کے مسائل سے نبرد آزما ہیں اور دھیرے دھیرے بیمار پڑ رہی ہیں۔ اس بات کا انکشاف ایک تحقیقی رپورٹ سے ہوا ہے۔

جرنل اَرتھ فیوچر میں جھیلوں کی صحت سے متعلق شائع ایک تحقیق میں کہا گیا ہے کہ جھیلوں کے علاج کے لیے ہمیں انسانی صحت کی دیکھ بھال میں استعمال کی جانے والی پالیسیوں کی ضرورت ہے۔ ان میں مسائل پیدا ہونے سے پہلے کارروائی کرنا، مستقل جانچ کرنا اور مقامی سے لے کر عالمی سطح تک مناسب پیمانے پر حل تلاش کرنا شامل ہے۔ محققین کے مطابق دنیا کی 12 فیصد سے زیادہ آبادی ان جھیلوں کے تین کلومیٹر کے دائرے میں بسی ہوئی ہے۔ یہ جھیلیں نہ صرف پانی کی ضروریات کو پورا کرتی ہیں، بلکہ ایکو سسٹم (ماحولیاتی نظام) سے متعلق ضروری خدمات فراہم کرنے میں اہم کردار نبھاتی ہیں۔

حقیقت یہ ہے کہ جھیلیں بھی انسانوں کی طرح ہی زندہ نظام ہیں۔ انھیں آکسیجن، صاف پانی اور متوازن توانائی کے ساتھ ساتھ غذائی عناصر کی ضرورت ہے۔ ایسا نہ ہونے پر ان میں سانس اور روانی سے جڑے مسائل، غذائی عناصر میں عدم توازن، درجہ حرارت، زہرناکی اور انفیکشن جیسی دقتیں آ رہی ہیں۔

بتایا جاتا ہے کہ تحقیق میں محققین نے لیک ایٹلس نامی ڈاٹا بیس کا استعمال کیا ہے۔ اس میں سے انھوں نے 14 لاکھ 27 ہزار 688 جھیلوں کے اعداد و شمار کا جائزہ لیا ہے۔ مطالعہ کے مطابق جہاں جھیلوں کے آس پاس کی 75 فیصد سے زیادہ زمین کا استعمال زراعت کے لیے کیا جا رہا ہے، وہاں جھیلوں میں بڑھتے غذائی عناصر کی وجہ سے مضر طحالب کے بڑھنے کا جوکھم زیادہ ہے۔

اس تحقیقی رپورٹ کے مطابق جہاں ڈَل جھیل کے سائز میں 25 فیصد تک گراوٹ آئی ہے، وہیں وولر جھیل کا آبی حلقہ بھی ایک چوتھائی سکڑ گیا ہے۔ وادیٔ کشمیر میں موجود جھیلیں گزشتہ کچھ سالوں میں تیزی سے سکڑ رہی ہیں۔ ساتھ ہی ان جھیلوں میں موجود پانی کا معیار بھی تیزی سے گر رہا ہے۔ یہ جانکاری ناسا اَرتھ آبزرویٹری کی طرف سے شیئر کی گئی رپورٹ میں سامنے آئی ہے۔