کورونا کے خلاف جانسن اینڈ جانسن کی ’سنگل شاٹ‘ ویکسین تیار!

کورونا کے خلاف جنگ میں ٹیکہ کاری کو سب سے بڑا ہتھیار مانا جا رہا ہے اور ہندوستان میں اب تک چار ویکسین کو ایمرجنسی استعمال کی منظوری مل چکی ہے اور کئی ویکسین منظوری کے لیے قطار میں کھڑی نظر آ رہی ہیں۔ اس درمیان ’جانسن اینڈ جانسن‘ نے ’سنگل شاٹ‘ ویکسین تیار کر لیا ہے جس کے ایمرجنسی استعمال کی منظوری کے لیے حکومت ہند سے مطالبہ کیا گیا ہے۔ ایمرجنسی استعمال کے لیے منظوری کی درخواست حکومت ہند سے کیے جانے سے قبل گزشتہ پیر کو کمپنی نے کہا تھا کہ وہ ہندوستان میں اپنی سنگل ڈوز والی کووڈ ویکسین لانے کے لیے پرعزم ہے اور اس سلسلے میں حکومت ہند کے ساتھ جاری بات چیت کو لے کر پرامید ہے۔

بہر حال، جانسن اینڈ جانسن کمپنی کے ترجمان نے ایک تازہ بیان میں کہا ہے کہ ’’جانسن اینڈ جانسن پرائیویٹ لمیٹڈ نے 5 اگست 2021 کو حکومت ہند کے پاس اپنی سنگل ڈوز والی کووڈ-19 ویکسین سے متعلق ’ای یو اے‘ کے لیے درخواست کی۔‘‘ بیان میں مزید کہا گیا ہے کہ یہ ایک اہم سنگ میل ہے جو بایولوجیکل ای لمیٹڈ کے ساتھ کمپنی کے اتحاد سے ہندوستان کے لوگوں اور باقی دنیا کو کووڈ ویکسین کے ’سنگل شاٹ‘ (ایک خوراک) پر مبنی متبادل دیتا ہے۔

قابل ذکر ہے کہ وزارت صحت نے بھی گزشتہ دنوں جانسن اینڈ جانسن کی ویکسین کو لے کر ایک بیان دیا تھا۔ نیتی آیوگ کے ہیلتھ رکن ڈاکٹر وی کے پال نے بتایا تھا کہ جانسن اینڈ جانسن کی ویکسین کا پروڈکشن باہر ہوتا ہے۔ حکومت ہند کے منصوبہ کے مطابق اس ویکسین کا پروڈکشن حیدر آباد کے بایو ای میں بھی کیا جائے گا۔ واضح رہے کہ فی الحال ملک میں 4 کورونا ویکسین کو ایمرجنسی استعمال کی اجازت ملی ہے جن میں کووی شیلڈ، کوویکسن، اسپوتنک وی اور ماڈرنا کی ویکسین شامل ہے۔ جانسن اینڈ جانسن کو منظوری مل جاتی ہے تو یہ ہندوستان میں پانچویں ویکسین ہوگی۔ حالانکہ سنگل شاٹ والی ہندوستان میں یہ پہلی ویکسین ہوگی۔