اتر پردیش کی یوگی حکومت نے 15 آئی پی ایس افسران کا کیا تبادلہ

جمعہ کی دیر شب اتر پردیش کی یوگی حکومت نے 15 آئی پی ایس افسران کا تبادلہ کرنے کا حکم جاری کر دیا۔ میڈیا رپورٹس کے مطابق سیتا پور، مئو، سونبھدر، سدھارتھ نگر اور سلطان پور اضلاع کے ایس پی بدلے گئے ہیں اور حکومت کی طرف سے ان کی جگہ نئے افسران کی تعیناتی کی گئی ہے۔ وارانسی پولیس کمشنریٹ میں تعینات سبھاش چندر دوبے کا لکھنؤ ٹرانسفر کیا گیا ہے۔ انھیں یہاں پولیس انسپکٹر جنرل ٹرانسپورٹیشن ڈائریکٹوریٹ میں تعینات کیا گیا ہے۔ علاوہ ازیں ایودھیا زون کے آئی جی کویندر پرتاپ سنگھ کا لکھنؤ پی اے سی ہیڈکوارٹر میں ٹرانسفر کیا گیا ہے۔ کویندر پرتاپ سنگھ کی جگہ امریندر پرساد سنگھ کو ایودھیا زون کے ڈی آئی جی کی ذمہ داری دی گئی ہے۔

اتر پردیش کے پانچ اضلاع میں نئے پولیس کپتان تعینات کیے گئے ہیں۔ سلطان پور کے پولیس سپرنٹنڈنٹ رہے ویپن کمار مشرا کو ڈی آئی جی عہدہ پر پروموٹ کیا گیا ہے۔ ان کی تعیناتی چترکوٹ دھام پر ڈی آئی جی عہدہ پر کی گئی ہے۔ دوسری طرف لکھنؤ میں ڈی سی پی ویسٹ کے عہدہ پر تعینات 2012 بیچ کے آئی پی ایس سومین ورما کو سلطان پور کا پولیس سپرنٹنڈنٹ بنایا گیا ہے۔ وارانسی پولیس کمشنریٹ میں بلند شہر ایس ایس پی سے ڈی آئی جی عہدہ پر پروموٹ ہوئے سنتوش کمار سنگھ کو وارانسی کمشنریٹ میں ڈی سی پی عہدہ پر تعینات کیا گیا ہے۔