کیا ہے بنگال کا ٹیچر بھرتی گھوٹالہ، جس میں 50 کروڑ روپے اور کئی کلو سونا برآمد ہوا؟

کولکاتا: مغربی بنگال میں وزیر پارتھو چٹرجی کو حال ہی میں ای ڈی نے گرفتار کیا ہے اور ان کی قریبی ارپیتا مکھرجی کے ٹھکانوں سے سرکاری تفتیشی ایجنسی نے 50 کروڑ روپے اور کئی کلو سونا برآمد کیا ہے۔ پارتھو چٹرجی پر یہ کارروائی ٹیچر بھرتی گھوٹالہ کے سلسلہ میں کی گئی ہے۔ سوال اٹھتا ہے کہ آخر ٹیچر بھرتی گھوٹالہ کیا ہے؟

ٹیچر بھرتی گھوٹالہ کیا ہے؟

یہ گھوٹالہ 2014 کا ہے، اس وقت مغربی بنگال اسکول سروس کمیشن (ایس ایس سی) نے سرکاری اسکولوں کے لئے تقرریاں نکالی تھیں۔ اس کے تحت بھرتی کا عمل 2016 میں اس وقت شروع ہوا، جب پارتھو چٹرجی وزیر تعلیم تھے۔ اس معاملہ میں بے ضابطگی کی کئی عرضیاں کولکاتا ہائی کورٹ میں داخل ہوئی تھیں۔

عرضی گزاروں کا الزام تھا جن امیدواروں کے نمبر کم تھے انہیں درجہ بندی کی فہرست (میرٹ لسٹ) میں اعلیٰ مقام فراہم کیا گیا اور کچھ تو ایسے امیدواروں کی بھی تقرری کر دی گئی جن کے نام فہرست میں تھے ہی نہیں۔ عرضی گزاروں نے یہاں تک دعویٰ کیا کہ کچھ ایسے امیدواروں کو بھی ملازمت فراہم کی گئی جنہوں نے اس امتحان کے لئے لازمی ٹی ای ٹی پاس ہی نہیں کیا تھا۔ دعویٰ کیا گیا کہ گھوٹالہ کے تحت 13 ہزار افراد کو غلط طریقہ سے ملازمت فراہم کی گئی۔

ان تمام درخواستوں پر سماعت کرتے ہوئے ہائی کورٹ نے سی بی آئی انکوائری کا حکم دیا تھا۔ اس کے بعد ای ڈی نے اساتذہ کی بھرتی اور عملے کی بھرتی کے معاملے میں منی ٹریل کی جانچ شروع کی۔ سی بی آئی نے 18 مئی کو اس معاملے میں پارتھو چٹرجی سے پوچھ گچھ بھی کی تھی۔

ای ڈی نے اس سال مئی میں اس معاملے کی جانچ شروع کی اور 22 جولائی کو پارتھو چٹرجی کے ٹھکانے سمیت 14 مقامات پر چھاپے مارے گئے۔ ای ڈی نے چھاپے کے دوران پارتھو چٹرجی کے گھر سے ارپیتا مکھرجی کی جائیداد کے دستاویزات برآمد کئے۔ جب پارتھو چٹرجی سے ارپیتا کی شناخت پوچھی گئی تو انہوں نے اس حوالے سے کوئی تسلی بخش جواب نہیں دیا۔ اس کے بعد ارپیتا مکھرجی ای ڈی کے ریڈار پر آ گئی۔ جب ای ڈی نے ارپیتا کے فلیٹ پر چھاپہ مارا تو تقریباً 21 کروڑ روپے نقد، 60 لاکھ روپے کی غیر ملکی کرنسی، 20 فون اور دیگر دستاویزات برآمد ہوئے۔ خیال رہے کہ ارپیتا ایک ماڈل ہیں اور وہ بنگلہ اور اوڈیہ فلموں میں چھوٹے موٹے کردار ادا کرتی رہی ہیں۔ ارپیتا پارتھو چٹرجی کی درگا پوجا کی برانڈ ایمبیسیڈر بھی رہ چکی ہیں۔

اس کے بعد بدھ کے روز ای ڈی نے ارپیتا کے دیگر مقامات پر بھی چھاپے مارے اور تقریباً 29 کروڑ روپے نقد برآمد کئے۔ اس کے علاوہ ای ڈی نے تقریباً 4.31 کروڑ روپے کا سونا بھی برآمد کیا۔ اس میں ایک کلو کی 3 سونے کی اینٹیں، آدھا کلو کے 6 سونے کے کنگن اور دیگر زیورات شامل ہیں۔

ای ڈی نے اس معاملے میں اب تک پارتھو چٹرجی، ارپیتا مکھرجی اور ٹی ایم سی کے رکن اسمبلی مانک بھٹاچاریہ سے پوچھ گچھ کی ہے۔ اس کے علاوہ سی بی آئی نے مغربی بنگال کے ایجوکیشن سکریٹری منیش جین سے بھی حال ہی میں پوچھ گچھ کی تھی۔ اس معاملے میں ایک اور ریاستی وزیر پریش ادھیکاری سے بھی پوچھ گچھ کی گئی تھی۔ یہی نہیں ان کی بیٹی کی ٹیچر کی نوکری بھی چلی گئی۔ الزام ہے کہ انکیتا ادھیکاری کو قواعد کو بالائے طاق رکھتے ہوئے نوکری دی گئی۔