’اردو بک ریویو‘ کی ویب سائٹ لانچ

’’اردو بک ریویو‘ اردو کو جدید تقاضے سے ہم آہنگ کرنے اور تحقیقی شعور بیدار کرنے کی کوششوں میں اہم کردار ادا کر رہا ہے۔‘‘ ان خیالات کا اظہار اردو بک ریویو کے ایڈیٹر محمد عارف اقبال نے اردو بک ریویو کے دفتر میں ویب سائٹ لانچ کے موقع پر کیا۔

پریس کلب آف انڈیا کے صدر گوتم لہری اور دیگر مہمانان خصوصی کا استقبال کرتے ہوئے عارف اقبال نے ’اردو بک ریویو‘ کے مقاصد اور خدمات پر اختصار کے ساتھ روشنی ڈالی۔ انہوں نے مزید کہا کہ اردو بک ریویو کی یہ ویب سائٹ یوجی سی کیئرلسٹ میں شامل ہونے کے بعد یوجی سی کی خصوصی گزارش پر تیار کی گئی ہے۔ اس ویب سائٹ کو رفتہ رفتہ مزید بہتر بنانے کی کوشش کی جاتی رہے گی۔

تقریب کی صدارت پریس کلب آف انڈیا کے صدر مسٹر گوتم لاہری نے کی۔ اس موقع پر جن اہم شخصیات نے شرکت کی ان میں سینئر صحافی اے یو آصف (ڈائرکٹر پریس کلب آف انڈیا)، سینئر پروفیسر اور قومی کونسل برائے فروغ اردو زبان کے سابق ڈائرکٹر ڈاکٹر ارتضیٰ کریم، ڈی ڈی نیوز کے سابق ڈپٹی ڈائرکٹر ادریس شاہجہانپوری، جامعہ ملیہ اسلامیہ کے شعبہ اردو میں اسسٹنٹ پروفیسر ڈاکٹر سیّد تنویر حسین، عرشیہ پبلی کیشنز دہلی کے مالک اظہار ندیم، حکیم ڈاکٹر آفتاب احمد، ریسرچ اسکالرز توحید حقانی اور نازش احمد خاص طور سے موجود تھے۔

پریس کلب کے صدر گوتم لاہری نے اردو بک ریویو کی ویب سائٹ لانچ کرنے کے بعد اظہار خیال کرتے ہوئے کہا کہ گزشتہ کئی برسوں سے پریس کلب میں اردو صحافیوں کو ممبرشپ دیتے ہوئے وہاں اردو کو جائز مقام دینے کی کوشش کا آغاز کردیا ہے۔ اس سلسلے میں معروف اردو صحافی اور مجاہد آزادی محمد باقر (شہید) کی خدمات کو اجاگر کرتے ہوئے پریس کلب آف انڈیا، نئی دہلی میں ان کا پوٹریٹ مستقل طور پر آویزاں کیا گیا ہے۔ پریس کلب میں اب ہر سال شہید محمد باقر کو خراج عقیدت پیش کرنے کے لیے پروگرام بھی منعقد کیا جاتا ہے۔ اردو کے اس مجاہد صحافی کی خدمات کو اجاگر کرنے میں سینئر صحافی اے یو آصف نے ہمیشہ فعال کردار ادا کیا ہے۔ گوتم لاہری نے یہ بھی عندیہ دیا کہ اردو سے ان کو گہری دلچسپی رہی ہے اور عنقریب وہ اس زبان کو سیکھ کر اردو کی مزید خدمت کرنا چاہتے ہیں۔ ویب سائٹ کے منتظمین میں محمد عمران قنوجی، ندیم عارف اور محمد حنیف نعمانی نے میزبانی کے فرائض ادا کیے۔