ممبئی میں پانی کا بحران، 30 مئی سے پانی میں 5 فیصد ہوگی تخفیف، جون میں مزید بڑھے گی عوام کی پریشانی

ممبئی میں ایک بار پھر پانی کا بحران پیدا ہو گیا ہے۔ اس بحران کو پیش نظر رکھے ہوئے بی ایم سی نے شہر میں پانچ فیصد پانی کی تخفیف کرنے کا اعلان کر دیا ہے۔ ممبئی میں پانی کی اس تخفیف پر 30 مئی سے عمل کیا جائے گا۔ اس کی وجہ یہ ہے کہ ممبئی کو پانی کی فراہمی کرنے والے ذخائر میں استعمال کرنے لائق پانی کا صرف 10 فیصد ذخیرہ بچا ہے۔

میونسپل کارپوریشن کا کہنا ہے کہ شہر میں پانی کی یہ تخفیف 5 جون سے 10 فیصد تک ہوگی۔ ایسا اس لیے کیا جائے گا تاکہ یہ یقینی بنایا جا سکے کہ پانی کا ذخیرہ طویل وقت تک بچا رہے۔ صرف ممبئی ہی نہیں بلکہ ٹھانے میونسپل کارپوریشن اور بھیونڈی نظام پور میونسپل کارپوریشن میں بھی اسی طرح کی تخفیف کی جا رہی ہے۔ 25 مئی کو جاری کردہ ایک رپورٹ کے مطابق ممبئی کو پانی کی فراہمی کرنے والے ذخائر میں 140202 ملین لیٹر ہی پانی باقی بچا ہے۔ یہ شہر کو سالانہ فراہم کیے جانے والے 1447364 ملین لیٹر پانی کا صرف 9.69 فیصد ہے۔

پانی فراہمی میں تخفیف سے متعلق یہ قدم میونسپل کارپوریشن چیف گگرانی کے اس بیان کے بعد اٹھایا گیا ہے جس میں انھوں نے کہا تھا کہ شہر میں پانی کا مناسب ذخیرہ نہیں ہے۔ میونسپل کارپوریشن کا کہنا ہے کہ پانی کے ذخیرہ پر لگاتار نظر ہے۔ مزید کہا گیا ہے کہ جب تک شہر میں مناسب بارش نہیں ہوگی، تب تک ممبئی میں پانی کی تخفیف جاری رہے گی۔ اس کے ساتھ ہی میونسپل کارپوریشن نے شہر کے باشندوں سے گزارش کی ہے کہ پانی کا استعمال بہت احتیاط کے ساتھ کریں۔