اترکاشی ٹنل حادثہ: بچاؤ مہم میں اگلے دو گھنٹے کافی اہم، محض 2 پائپ ٹنل میں ڈالنا باقی

اتراکھنڈ کے اترکاشی واقع سلکیارا ٹنل حادثہ کے تیرہویں دن جمعہ کو سب سے بڑی اَپڈیٹ سامنے آئی ہے۔ ٹنل میں پھنسے مزدوروں کو بچانے کے لیے جاری ریسکیو آپریشن میں اگلے دو گھنٹے کافی اہم ہیں۔ افسران نے بتایا کہ آگر مشین ٹھیک ہو گئی ہے اور دو گھنٹے مین ٹنل کے اندر بچے ہوئے دو پائپ ڈال دیے جائیں گے۔ اگر سب کچھ صحیح رہا تو جلد ہی ریسکیو آپریشن میں بڑی کامیابی مل سکتی ہے اور ٹنل کے اندر پھنسے 41 مزدوروں کو بہ حفاظت باہر نکالا جا سکتا ہے۔

دراصل ابھی تک 48 میٹر تک ڈریلنگ کر کے پائپ ڈال دیے گئے ہیں۔ لیکن جمعرات سے ریسکیو آپریشن میں دقتیں آ رہی ہیں۔ سنٹرل روڈ ٹرانسپورٹیشن نیشنل ہائی وے وزارت کے ایڈیشنل سکریٹری محمود احمد کے مطابق اگلے دو گھنٹے میں ٹنل کے اندر بچے ہوئے دو پائپ ڈال دیے جائیں گے۔ آگر مشین بھی ٹھیک کر دیا گیا ہے۔ امید ہے کہ اگر سب کچھ صحیح طریقے سے چلا تو جلد ہی ریسکیو آپریشن میں بڑی کامیابی مل سکتی ہے۔

اگر ٹنل حادثے کی بات کریں تو 13 دنوں سے لگاتار ریسکیو آپریشن جاری ہے۔ تقریباً 48 میٹر حصے میں پائپ اندر جا چکے ہیں۔ آگے کے 12 میٹر کا حصہ کافی اہم ہے۔ جمعرات کو آگر مشین آگے نہیں بڑھ پا رہی تھی۔ اس کا سبب مشین کے راستے میں لوہے کی راڈ آنا بتایا گیا۔ اس دوران آگر مشین بھی خراب ہو گئی تھی۔ دہلی سے آئی ایکسپرٹ کی ٹیم نے مشین کو ٹھیک کر دیا۔ دوبارہ آگر مشین سے ڈریلنگ شروع ہوئی تو مشین کا پلیٹ فارم منہدم ہو گیا تھا جس وجہ سے جمعرات کو رات بھر ڈریلنگ نہیں ہو سکی۔

دوسری طرف وزیر اعلیٰ پشکر سنگھ دھامی نے بتایا کہ ریسکیو آپریشن آخری مرحلہ میں ہے۔ پی ایم مودی لگاتار مزدوروں کے بارے میں پوری جانکاری لے رہے ہیں۔ مرکزی اور ریاستی حکومت کی سبھی ایجنسیاں مل کر ریسکیو آپریشن میں مصروف ہے۔ امید ہے کہ جلد ہی یہ آپریشن پورا ہوگا۔ سبھی مزدور بہ حفاظت باہر آ جائیں گے۔

بڑی بات یہ ہے کہ مزدوروں کو باہر نکالنے کے لیے آج این ڈی آر ایف کی ٹیم نے ’موک ڈرل‘ بھی کیا ہے۔ اس دوران پہیہ لگے اسٹریچر کی ٹیسٹنگ بھی کی گئی ہے۔ واضح رہے کہ 12 نومبر کو دیوالی کی صبح سے چار دھام روڈ پروجیکٹ کے کام میں لگے 41 مزدور ٹنل دھنسنے سے ملبہ آنے کے سبب ٹنل میں پھنسے ہیں۔ ان کو بہ حفاظت باہر نکالنے کے لیے ریسکیو آپریشن چل رہا ہے۔