اتراکھنڈ حکومت انتخابی کمیشن کی ہدایات کی دھجیاں اڑا رہی، ہریش راوت کا الزام

اتراکھنڈ کے سابق وزیر اعلیٰ ہریش راوت نے پیر کے روز ایک پریس کانفرنس میں ریاست کی بی جے پی حکومت پر انتخابی کمیشن کی ہدایات کی خلاف ورزی کرنے کا الزام عائد کیا ہے۔ انھوں نے بی جے پی حکومت پر انتخابی تاریخوں کے اعلان کے بعد آبکاری محکمہ کے ذریعہ کچھ اہم احکام جاری کرنے اور مختلف محکموں میں بڑے پیمانے پر تبادلے کا الزام عائد کیا ہے۔

ہریش راوت نے کہا کہ انتخاب کے اعلان کے بعد آبکاری محکمہ کی جانب سے حکم جاری کیا گیا۔ اس کے ذریعہ کروڑوں روپے کا کھیل کھیلا گیا۔ اتنا ہی نہیں، آبکاری، تعلیم، صحت، کوآپریٹو محکمہ میں جاننے والوں کو پوسٹنگ دی گئی۔ محکمہ تعلیم میں کھلے طور پر چھٹی کے دن 600 سے زائد تبادلے کے احکام جاری کیے گئے۔

ہریش راوت نے کہا کہ انتخابی ضابطہ اخلاق نافذ ہونے کے بعد تقرریاں کرنا مناسب نہیں ہے۔ اس معاملے میں کانگریس نے انتخابی کمیشن کے پاس شکایت درج کرائی ہے۔ کانگریس نے انتخابی کمیشن سے عہدیداروں کے معاملے میں نوٹس لینے کا مطالبہ کرتے ہوئے کہا کہ جن افسران کے حکم سے عہدیداروں کی تقرری کی جا رہی ہے، ان کے خلاف بھی کارروائی کی جائے۔

غور طلب ہے کہ گزشتہ ہفتے 8 جنوری کو انتخابی کمیشن نے اتراکھنڈ سمیت 5 ریاستوں میں اسمبلی انتخاب کی تاریخوں کا اعلان کیا تھا۔ انتخابی تاریخوں کے اعلان کے بعد انتخابی ریاستوں میں ماڈل کوڈ آف کنڈکٹ نافذ ہو جاتا ہے۔ اس کے تحت حکومتیں کوئی نیا منصوبہ یا پالیسی کا اعلان نہیں کر سکتی ہے۔ ساتھ ہی حکومتیں بغیر کمیشن کی اجازت لیے سرکاری افسران-ملازمین کے تبادلے بھی نہیں کر سکتی ہے۔ ایسے میں بی جے پی حکومت کے ذریعہ اتنے بڑے پیمانے پر تبادلہ کیے جانے پر سوال کھڑے ہو گئے ہیں۔