اتر پرادیش: کورونا کرفیو کی مدت میں جمعرات تک کا اضافہ

لکھنؤ: اتر پردیش میں یوگی حکومت نے کورونا انفیکشن کو بڑھنے سے روکنے کے لئے کورونا کرفیو میں مزید دو دن کی توسیع کرتے ہوئے چھ مئی صبح سات بجے تک کر دیا ہے۔ اس سے قبل لاک ڈاؤن کی مدت منگل کی صبح ساتھ بجے تک تھی۔

سرکاری ذرائع نے پیر کے روز بتایا کہ کورونا کے بڑھتے ہوئے معاملات کے پیش نظر ہفتہ وار پابندی کی مدت میں توسیع کی گئی ہے۔ اس دوران ضروری خدمات بحال رہیں گی۔ لاک ڈاؤن کے دوران بلدیہ اور میونسپل کارپوریشن کی ٹیمیں جگہ جگہ سینیٹائیزیشن کا کام انجام دیں گی۔

حکومت کی طرف سے لاک ڈاون میں دو دن کی توسیع کی وجہ سے اب ریاست میں پنچایتی انتخابات کے فاتحین بڑا جشن منانے سے محروم رہیں گے۔ انہوں نے بتایا کہ لاک ڈاؤن کے دوران بلا وجہ کسی کا بھی باہر نکلنا بند ہوگا۔ مطلوبہ علاقے کے لوگوں کو چھوٹ رہے گی اور آمدورفت بھی بحال رہے گی۔